У бундэстагу занепакоіліся будаўніцтвам АЭС у Беларусі

Дэпутаты бундэстага ад партый зялёных, сацыял-дэмакратаў і левых занепакоіліся будаўніцтвам АЭС у Беларусі і рыхтуюць запыты да беларускага і нямецкага ўрадаў.

У нямецкім парламенце лічаць, што ў Германіі павінны ведаць аб праблеме будаўніцтва беларускай атамнай станцыі і абмяркоўваць іх з Беларуссю, паколькі ў выпадку аварыі на гэтым аб'екце Германія можа пацярпець.

Як паведаміла БелаПАН Марылуіза Бек, дэпутат бундэстага ад нямецкай Партыі зялёных, яна рыхтуе афіцыйны запыт да беларускага ўраду з нагоды шэрагу праблем, звязаных з бяспекай АЭС, якая будуецца, а таксама міжнароднымі канвенцыямі. Гэты запыт будзе накіраваны на наступным тыдні.

Старшыня камітэта па экалогіі Эва Булінг-Шрэтэр мае намер звярнуцца таксама ў нямецкі ўрад з пытаннямі аб удзеле ў дыялогу з Беларуссю па будаўніцтве АЭС у рамках канвенцыі Эспаа.

Дэпутаты бундэстага збіраюць не толькі афіцыйную інфармацыю аб будаўніцтве АЭС у Беларусі. Іх цікавіць меркаванне незалежных экспертаў і грамадскасці. Так, на мінулым тыдні яны арганізавалі сустрэчы ў бундэстагу, у Берліне, з каардынатарам беларускай антыядзернай кампаніі Таццянай Новікавай.

Як пракаментавала Новікава: «Не толькі для Германіі важна ведаць, што адбываецца ў Беларусі з будаўніцтвам АЭС, але і для беларускага грамадства крытычна важная інфармацыя аб тым, як развіваецца энергетыка Германіі. А нямецкая энергетычная індустрыя сёння сыходзіць ад атамнай энергетыкі і рухаецца ў бок новых аднаўляльных тэхналогій - і гэта паказваюць лічбы».

«Так за апошнія некалькі гадоў доля аднаўляльнай энергетыкі ў Германіі склала каля 25%, што пераўзыходзіць долю энергіі ад АЭС. Хацелася б, каб Беларусь брала прыклад з Германіі», - дадала Новікава.