Чыноўнікі становяцца «пад ружжо» (Фота)

Вар'яцкая ідэя стварыць так званую тэрытарыяльную абарону не забытая.

13-14 лістапада ў Віцебску генерал Касінец праводзіў вайсковыя зборы. Ён сабраў больш за 70 чалавек. У іх ліку кіраўнікі сілавых структур Прыдзвіння, старшыні раённых і гарадскіх выканаўчых камітэтаў, прадстаўнікі прадпрыемстваў-распрацоўнікаў інавацыйных сродкаў абароны, узбраення і спецтэхнікі, піша «Народная воля».

Адкрыўся збор арганізацыйным сходам, на якім старшыня Віцебскага аблвыканкама Аляксандр Касінец падвёў вынікі выканання мерапрыемстваў па ўдасканаленні тэрытарыяльнай абароны ў Віцебскай вобласці ў бягучым годзе і вызначыў задачы на 2013-ы.

Далей удзельнікі збору пабывалі на кантрольна-прапускным пункце, размешчаным на Бешанковіцкай шашы. Там адбыліся комплексныя вучэнні, якія ўключаюць арганізацыю нясення службы на кантрольна-прапускным пункце (КПП), яго абарону ад бандфармаванняў, дагляд транспартных сродкаў, якія здольныя перавозіць узбраенне і наркотыкі, размініраванне прадмета, начыненага невядомымі выбуховымі рэчывамі, затрыманне дыверсійнай групы і іншага.

На базе склада захоўвання нафтапрадуктаў № 1 РУП «Беларуснафта-Віцебскаблнафтапрадукт» адбыўся занятак па арганізацыі аховы аб'екта тэрытарыяльнай абароны, планава-папераджальнага сістэмы назірання, прапускнога і ўнутрыаб’ектавага рэжымаў, а таксама ліквідацыі наступстваў праведзенай дыверсіі з паказам спецыяльнай тэхнікі.

Падводзячы вынікі збору старшыня Віцебскага аблвыканкама, начальнік зоны тэрытарыяльнай абароны № 4 Аляксандр Касінец адзначыў, што войскі тэрытарыяльнай абароны Віцебскай вобласці, якія ўваходзяць у сістэму Узброеных сіл Рэспублікі Беларусь, спрацавалі на выдатна. Аднак насіць вайсковыя берцы сам Касінец так і не навучыўся і бруд на палігоне мясіць ён відавочна не збіраецца. Яго палявая форма па-ранейшаму дапоўнена лёгкімі туфлямі. Больш за тое, так і засталося незразумелым, навошта ладзіць такія дарагія экскурсіі на палігоны для кіруючага складу вобласці і забаўляць іх «гульнёй у вайнушку» з выкарыстаннем рэальнай тэхнікі ва ўмовах катастрафічнага дэфіцыту сродкаў.