Новыя суды ў Свіслачы
3- 19.11.2012, 11:06
У Свіслачы працягваецца судовая расправа над удзельнікамі акцыі памяці Каліноўскага.
Павесткі атрымалі дэмакратычныя актывісты Анатоль Валюк, Юрый Глебік і Віктар Дзесяцік - іх будуць судзіць 26 і 27 лістапада, паведамляе «Радыё Свабода».
Дэмакратычных актывістаў абвінавачваюць ва ўдзеле ў несанкцыянаванай акцыі 27 кастрычніка.
27 кастрычніка ў Свіслачы людзі з розных гарадоў Беларусі традыцыйна адзначалі памяць паўстанцаў Каліноўскага. Дэмакратычныя актывісты ўсклалі кветкі на магілу Віктара Каліноўскага, да помнікаў Кастусю Каліноўскаму і Рамуальду Траўгуту, наведалі радзіму Каліноўскіх - сядзібу Якушоўка.
У той дзень міліцыянты затрымалі ў Свіслачы 4 маладых людзей, склалі пратаколы за ўдзел у несанкцыянаванай акцыі і выкарыстанні незарэгістраванай сімволікі, а пазней за ўсіх асудзілі на адміністрацыйныя арышты і выплату штрафаў.