ХАМАС заявіў пра дасягненне замірэння з Ізраілем
52- 20.11.2012, 21:34
Бліжэйшым часам будзе абвешчанае пагадненне пра спыненне агню паміж ХАМАС і Ізраілем, сказалі егіпецкія і палестынскія прадстаўнікі.
Прэзідэнт Егіпту Махамед Мурсі, які выступаў пасярэднікам, сказаў у аўторак, што чакае спынення авіяабстрэлу Газы з боку Ізраілю ўжо «сёння». Прадстаўнік ХАМАС сказаў, што пагадненне будзе дасягнутае неўзабаве, паведамляе ВВС.
Ізраіль не каментуе, але ён адклаў планы наземнага ўварвання ў сектар Газа.
Раней ізраільскія ВПС раскідалі тысячы ўлётак над сектарам Газа з заклікам да жыхароў паўночнай, усходняй і паўднёвай частак сектара пакінуць свае дамы і эвакуявацца ў цэнтр Газы.
Рух ХАМАС, у сваю чаргу, назваў гэтыя заклікі ізраільскай прапагандай, накіраванай на запалохванне насельніцтва, і заклікаў жыхароў Газы заставацца ў сваіх дамах.
Ваенныя дзеянні пачаліся ў мінулую сераду, калі прыцэльным ударам ізраільскай ракеты ў Газе быў забіты лідар вайсковага крыла ХАМАС, і Ізраіль абвясціў аперацыю «Віхор», мэтай якой абвешчанае «спыненне ракетных абстрэлаў ізраільскай тэрыторыі» з боку сектара Газа.
З таго часу загінулі больш за 110 палестынцаў і трое ізраільцян.