Лабковіч: Кватэру Алесю Бяляцкаму не вернуць

Па словах судовых выканаўцаў, пасля вызвалення палітвязня будзе разглядацца пытанне аб яго праве ўласнасці на памяшканне, якое апячаталі.

«Адбылася канчатковая канфіскацыя офіса праваабарончага цэнтра «Вясна». Ён зараз апячатаны, уваход у памяшканне нам катэгарычна забаронены. Гэта маёмасць больш нам не належыць і мы не можам там працаваць», - распавёў сайту charter97.org сябра Савета праваабарончага цэнтра «Вясна» Уладзімір Лабковіч.

На думку праваабаронцы, кватэру Алесю Бяляцкаму не вернуць:

«Уваход у памяшканне не будзе адмыкнуты адразу пасля выхаду на волю Алеся Бяляцкага. Са слоў судовага выканаўцы, пасля вызвалення палітвязня будзе зноў вырашацца яго права ўласнасці на памяшканне. Я думаю, што яму не пакінуць кватэру. Я разумею беларускае заканадаўства і лічу, што яму не могуць пакінуць гэтую маёмасць».

Уладзімір Лабковіч дзякуе ўсіх неабыякавых людзей, якія падтрымалі калектыў «Вясны» ў гэты няпросты для іх час:

«Мы вельмі ўдзячныя праваабаронцам, палітыкам, грамадскім дзеячам і родным палітвязняў, якія праявілі з намі салідарнасць пры развітанні з офісам. Мы ўдзячныя і нашым партнёрам і блізкім сябрам з руху «За свабоду» і камітэта дапамогі рэпрэсаваным «Салідарнасць», якія далі нам магчымасць весці ў іх офісе нашу часовую грамадскую прыёмную, дзе мы будзем увесь час аказваць дапамогу палітвязням і ўсім грамадзянам, якія пацярпелі ад сённяшняга рэжыму».

Хутка «Вясна» пачне працаваць з новага офіса, адзначыў праваабаронца:

«Безумоўна, мы чакалі, што сітуацыя будзе разгортвацца ў тым напрамку, які мы цяпер маем, мы былі падрыхтаваныя да канфіскацыі. Я думаю, у бліжэйшы час мы зможам працягнуць працу ў поўным аб'ёме ў новым сталым памяшканні».

Нагадаем, сёння раніцай у офіс праваабаронцаў прыйшлі судовыя выканаўцы, міліцыя і прадстаўнікі Гаргазу, якія правялі працэдуру канфіскацыі маёмасці і апячаталі памяшканне.

17 лістапада жонка Алеся Бяляцкага Наталля Пінчук атрымала ліст з суда Першамайскага раёна Менска за подпісам судовага выканаўцы А.Рандзевіч аб тым, што 26 лістапада адбудзецца канфіскацыя маёмасці і офіса праваабарончага цэнтра «Вясна».

12 апошніх гадоў офіс праваабарончага цэнтра «Вясна» знаходзіўся ў кватэры на праспекце Незалежнасці 78а-48. Гэтая кватэра была набытая ў 2000 годзе і па рашэнні савета «Вясны» аформленая на прыватную асобу, у ёй быў афіцыйна зарэгістраваны Алесь Бяляцкі.