На праекты алігархаў Чыжа і Цярнаўскага таксама няма грошай

Аляксандр Лукашэнка не даў грошай на стварэнне інжынернай інфраструктуры «Зялёнага Бора».

Гэты раён планавалася ўзвесці недалёка ад Менска. Пра гэта беларускі кіраўнік заявіў 29 лістапада на нарадзе па развіццю жыллёвага будаўніцтва ў сталіцы, піша TUT.by..

Нагадаем, што першапачаткова ў 2008 годзе планавалася, што забудову тэрыторыі ў раёне пасёлка Калодзішчы, дзе, у прыватнасці, размяшчаецца вайсковы палігон, ажыццявяць кампаніі «Трайпл» і «Юнівест-М», падкантрольныя неўязнымі ў Еўразвяз алігархам Юрыю Чыжу і Анатолю Цярнаўскаму адпаведна. У гэтых прадпрымальнікаў была задумка стварыць мікрараён з нізкапаверхавай забудовай. Аднак за мінулы час працы тут так і не былі пачатыя.

Як далажыў 29 лістапада на нарадзе па гэтым пытанні старшыня Камітэта дзяржкантролю Аляксандр Якабсон, галоўнай праблемай з'яўляецца будаўніцтва інжынернай інфраструктуры, на якую неабходна 4 млрд даляраў па разліку праекціроўшчыкаў. «Сёння гадавы бюджэт горада Менска складае 33 трлн рублёў. З бюджэту горада на ўсю інфраструктуру Менска вылучаецца каля 1 трлн. Таму казаць пра тое, што Менск зможа калісьці сваімі сіламі зрабіць гэтую інфраструктуру, не прыходзіцца. Безумоўна, патрабуецца ўдзел рэспубліканскага бюджэту», - адзначыў Аляксандр Якабсон. Паводле яго слоў, затраты на асваенне 1 кв.м гэтай тэрыторыі будуць складаць 1672 даляраў, у той час як на звычайнай тэрыторыі - да 1 тысячы даляраў.

Лукашэнка падкрэсліў, што разлічваць на вылучэнне падобнай сумы з бюджэту не варта: «Я не збіраюся будаваць інфраструктуру за 4 млрд даляраў, каб заўтра туды прыйшоў бізнес і зарабіў нармальныя там грошы. Я гэтага рабіць не буду. Як быццам у нас няма дзе больш у краіне будаваць дарогі, газ пракладаць і электрычныя сеткі! Ды мы паўкраіны падымем за 4 млрд даляраў!». «Мне здаецца, у Менску маса праблем, на рашэнне якіх трэба выдаткаваць грошы. Таму няма чаго лезці сёння ў «Зялёны Бор», калі няма грошай, - падкрэсліў ён. - Будзе няправільна з майго боку, калі я сёння ўкладу гэтыя грошы ў Зялёны Бор . Хай нават не 4 млрд даляраў, а ўдвая менш. Колькі вёсак, малых гарадоў за гэтыя грошы прывядзем у парадак! Але і не гэта галоўнае сёння. Інвестыцыі ў асноўны капітал, у вытворчасць - вось, у што сёння трэба ўкладваць грошы. Я колькі прадпрыемстваў ствару, якія прынясуць грошы! Гэта важней для мяне сёння, чым укладваць туды ў інфраструктуру».

Як адзначыў віцэ-прэм'ер Анатоль Калінін, пралічвалася, што фінансаванне інфраструктуры «Зялёнага Бора» будзе ісці з усіх крыніц: як рэспубліканскага і мясцовага бюджэтаў, так і за кошт сродкаў прыватных кампаній, якія жадаюць забудоўваць гэтую тэрыторыю. Паводле яго слоў, прапрацоўваецца магчымасць комплекснага асваення цэлага рэгіёну: «Зялёны Бор» размешчаны паблізу пасёлка Сокал, той у сваю чаргу мяжуе з Беларуска-кітайскім індустрыяльным паркам, затым ідуць Смалявічы. Анатоль Калінін дадаў, што гэтае пытанне патрабуе дадатковага вывучэння.

На нарадзе выступілі таксама і інвестары, якія першапачаткова планавалі забудоўваць тэрыторыю «Зялёнага Бора». Па іх словах, з моманту распрацоўкі праекта змянілася эканамічная сітуацыя, у планы ўнёс карэктывы і фінансава-эканамічны крызіс. У той жа час прыватныя кампаніі не адмаўляюцца ад рэалізацыі праекта, а жадаюць скараціць яго аб'ёмы і падоўжыць тэрміны.

Так, у прыватнасці, прапануецца забудаваць тэрыторыю ў 260 га, дзе размесціцца 1,2 млн кв.м жылля. «Юнівест-М» гатовы ўзвесці 500 тысяч квадратных метраў жылля. Астатнія 700 тысяч возьме на сябе Менгарвыканкам. Дадзеную раскладку агучыў на нарадзе кіраўнік «Юнівест-М» Анатоль Цярнаўскі, гаворыцца ў сюжэце тэлеканала СТВ. Менгарвыканкам таксама прафінансуе інфраструктурныя работы на суму 25 млн даляраў. Абмяркоўвалася прапанова вызваліць «Юнівест-М» ад абавязацельства пабудовы школы і дзіцячага садка і падоўжыць тэрміны забудовы да 2020 года. Аляксандр Лукашэнка пагадзіўся па тэрмінах, але што тычыцца школы і дзіцячага садка - «тут трэба нам падумаць». «Я не гатовы сёння сказаць: «Добра, здымем гэта абцяжаранне» і гэтак далей», - сказаў кіраўнік дзяржавы. Тут варта адзначыць, што раней «Юнівест-М» анансаваў у Калодзішчах забудову жылога комплексу пад назвай «Нотынгем». На 290,3 га меркавалася пабудаваць больш за 850 тыс. кв. м жылля для 21 тысячы чалавек.

Аўтарам праекту пад назвай «Зялёны Бор» (не блытаць з тым, што вырас у Бараўлянах) была кампанія «Трайпл». Але яна вырашыла пакуль выйсці з праекта па забудове ў пасёлку Калодзішчы. «Трайпл» мае намер працаваць па іншых праектах у супрацоўніцтве з Міністэрствам абароны. На нарадзе дамовіліся, што «Трайпл» пабудуе каля 100 тыс.кв.м жылля для вайскоўцаў, гэта значыць у 2 разы менш чым меркавалася раней. У якасці кампенсацыі за гэта Юрый Чыж атрымае права забудаваць зямельныя ўчасткі, размешчаныя ў Менску і ў Менскім раёне, якія вызваляць вайскоўцы..