ЗВР скараціліся на $100 мільёнаў за месяц
26- 6.11.2012, 16:36
Беларусь працягвае «праядаць» золатавалютныя рэзервы.
На 1 лістапада 2012 года ЗВР склалі 8023,2 млн. даляраў ЗША, знізіўшыся на 102,8 млн. даляраў ЗША (1,3%) за кастрычнік, паведамляе АФН са спасылкай на Нацбанк.
Нагадаем, у верасні было зафіксавана зніжэнне на 15,2 млн. даляраў, у жніўні - на 106,3 млн. даляраў ЗША, у ліпені - 82 млн. даляраў ЗША пасля росту на 291 млн. даляраў ЗША ў чэрвені.
У складзе ЗВР рэзервовыя актывы ў замежнай валюце склалі 3165,5 млн. даляраў ЗША, знізіўшыся на 160,9 млн. даляраў ЗША (4,8%) у кастрычніку. Манетарнае золата знізілася на 72 млн. даляраў ЗША (3,0%) да 2282,7 млн. даляраў ЗША на 1 лістапада.
Іншыя актывы склалі 2006,2 млн. даляраў ЗША, павялічыўшыся на 130,7 млн. даляраў ЗША (7%). СДР (спецыяльныя правы запазычання МВФ) за кастрычнік практычна не змяніліся і склалі 568,9 млн. даляраў ЗША на 1 лістапада.
Варта адзначыць, што зніжэнне ЗВР у кастрычніку адбылося нягледзячы на намаганні беларускіх улад рэфінансаваць кожны цэнт міжнародных абавязацельстваў. У якасці прыкладу можна прывесці прамы продаж 3-гадовых валютных ДДА Мінфіна РБ Белзнешэканомбанку на суму $100 млн. Менавіта столькі Беларусь вярнула (павінна была вярнуць) ЕАБР пры пралангацыі мільярднага крэдыту «Беларуськалію».