Крызіс улады ў Літве: Грыбаўскайтэ звярнулася ў КС

Без заключэння Канстытуцыйнага суда левацэнтрысцкі ўрад не зацвердзяць.

Лідэр сацыял-дэмакратаў і патэнцыйны прэм'ер Літвы Альгірдас Буткявічус сёння прыбыў у прэзідэнцкую адміністрацыю. Па просьбе палітыка, яго прыняла прэзідэнт Даля Грыбаўскайтэ. Прэзідэнт пасля гэтай сустрэчы вырашыла звярнуцца ў Канстытуцыйны суд па выніках парламенцкіх выбараў, і пакуль не гаварыць аб фарміраванні кааліцыі, піша ru.delfi.lt.

«Так як пасля абвяшчэння канчатковых вынікаў парламенцкіх выбараў было атрымана шмат скаргаў у сувязі з імі (...), прэзідэнт заўтра звернецца ў КС. Пакуль не будзе канчатковай ацэнкі КС па парламенцкіх выбарах, прэзідэнт не будзе ацэньваць ніякіх магчымасцей стварэння кааліцыі», - сказала журналістам галоўны дарадца прэзідэнта Дайва Ульбінайтэ.

Падпішуць дамову кааліцыі без размеркавання міністэрстваў

Буткявічус пасля сустрэчы з прэзідэнтам сцвярджаў, што гутарка праходзіла «ў сяброўскай атмасферы». Ён сказаў, што пасля размовы ўсё роўна будзе падпісана дамова кааліцыі. Праўда, крыху іншая, чым планавалася раніцай.

«Хутчэй за ўсё, у суботу КС прыме рашэнне, і стане больш яснай далейшая палітычная праца ў Сейме. (...) Я думаю, КС развее ўсе сумневы. Мы не прадставілі (кандыдатуры міністраў). Думаю, пасля рашэння КС прэзідэнт прыме рашэнне, калі склікаць новы Сейм. Калі высновы КС будуць такімі, што парушэнняў няма, напэўна, будзем працягваць працу. Мы падпішам дамову кааліцыі. Але да дамовы не будзе прылажэння з размеркаваннем міністэрстваў», - сказаў журналістам Буткявічус.

Ён адзначыў, што размеркаванне міністэрстваў можа мяняцца.

Успаскіх: аб Партыі працы нічога не сказана

Лідэр Партыі працы Віктар Успаскіх сказаў, што будзе чакаць вердыкту КС.

«Калі прэзідэнт вырашыла, так і будзе», - сказаў ён.

На пытанне, ці не лічыць ён, што зварот у КС накіраваны супраць Партыі працы, палітык адказаў, што не чуў гэтага ад прэзідэнцкай адміністрацыі. «Аб гэтым не сказана», - лаканічна пракаментаваў Успасских.

«Будзем чакаць рашэння КС і выконваць волю прэзідэнта», - сказаў лідэр «прааўнікоў».

Буткявічус прыбыў да прэзідэнта пасля перамоў, на якіх у панядзелак партыі левацэнтрысцкай кааліцыі дамовіліся пра пасты ва ўрадзе.

Вырашана, што сацдэмам дастанецца пост прэм'ера і сем міністэрстваў: фінансаў, замежных спраў, абароны, транспарту, эканомікі, аховы здароўя і юстыцыі.

«Парадак і справядлівасць» па дамоўленасці атрымае два паста міністраў - аховы навакольнага асяроддзя і энергетыкі.

Партыя працы ўзначаліць міністэрства сельскай гаспадаркі, навукі і асветы, унутраных спраў, сацыяльнай абароны і працы і культуры. А таксама - крэслы спікера і першага віцэ-спікера Сейма.

Выбарчай акцыі палякаў Літвы, апошняй запрошанай на перамовы, у кааліцыі пакуль няма. Гэтая партыя вылучыла патрабаванне, што будзе ўдзельнічаць у кааліцыі толькі ў тым выпадку, калі ў яе будуць такія ж умовы, як у партыі «Парадак і справядлівасць».