Сайт Хартыі'97 прыняты ў ICAED

Сайт сharter97.org стаў сябрам Міжнароднай кааліцыі супраць гвалтоўных знікненняў (ICAED).

Рашэнне аб гэтым прынята падчас сустрэчы ў Жэневе 29 кастрычніка 2012 года. Кіруючы камітэт кааліцыі ўхваліў сяброўства беларускай арганізацыі з улікам «важнай працы, якую яна праводзіць у барацьбе супраць гвалтоўных знікненняў», гаворыцца ў лісце, атрыманым галоўным рэдактарам charter97.org Наталляй Радзінай ад генеральнага сакратара Азіяцкай федэрацыі супраць гвалтоўных знікненняў Мэры Эйлін Бакальсо.

Кааліцыя будзе інфармаваць сайт charter97.org аб сваёй дзейнасці і распаўсюджваць інфармацыю аб выкраданнях і забойствах, якія адбываюцца ў Беларусі.

ICAED аб'ядноўвае больш за 40 арганізацый, якія вядуць барацьбу супраць гвалтоўных знікненняў як на мясцовым, так і на міжнародным узроўні. Таксама ў яе ўваходзяць арганізацыі, якія аб'ядноўваюць сем'і ахвяр гвалтоўных знікненняў.

Адна з асноўных мэт кааліцыі - ратыфікацыя і эфектыўнае ажыццяўленне ўсімі краінамі Міжнароднай канвенцыі супраць гвалтоўных знікненняў, якая была прынятая Генеральнай Асамблеяй ААН 20 снежня 2006 года.

ICAED была афіцыйна заснавана ў верасні 2007 года падчас правядзення Савета па правах чалавека ААН у Жэневе. У тым жа годзе вядомыя юрысты распрацавалі першы тэкст Канвенцыі супраць гвалтоўных знікненняў.

У сувязі з тым, што шэраг краін, у якіх парушаюцца правы чалавека, адмовіліся далучыцца да Канвенцыі, ICAED пачала міжнародную кампанію па яе ратыфікацыі.

У рамках кампаніі кааліцыя распаўсюджвае інфармацыю аб выкраданнях і забойствах, у тым ліку і па палітычных матывах, па ўсім свеце і дамагаецца расследавання гэтых інцыдэнтаў.

Нагадаем, што ў Беларусі былі выкрадзеныя шэраг вядомых палітыкаў і грамадскіх дзеячаў - Віктар Ганчар, Анатоль Красоўскі, Зміцер Завадскі, Юрый Захаранка. Вінаватыя ў іх выкраданні да гэтага часу не знойдзены. Міжнародная грамадскасць лічыць, што да гэтых злачынстваў датычныя ўлады Беларусі.