Нацбанк зробіць больш жорсткімі патрабаванні да банкаў

Нацыянальны банк Беларусі заяўляе пра магчымае прымяненне мер рэгулявання пры дысбалансах на рынку спажывецкага крэдытавання.

Пра гэта паведаміў сёння журналістам намеснік старшыні праўлення Нацбанка Сяргей Дубкоў, перадае БелТА.

Банкі, якія зладзілі гонку па стаўках і ліквіднасці і абвясцілі аб фарміраванні дарагой пасіўнай базы, сутыкнуліся з неабходнасцю гэтую базу выкарыстоўваць, растлумачыў прадстаўнік Нацбанка.

«Калі тэмпы прыросту спажывецкага крэдытавання будуць выходзіць за пэўныя рамкі, якія мы зараз вызначаем, зыходзячы з плацежаздольнасці насельніцтва, мы будзем прымяняць тыя або іншыя меры для рэгулявання», - адзначыў Сяргей Дубкоў.

У якасці такіх мер могуць выступіць больш жорсткія патрабаванні па фарміраванні банкамі рэзерваў і статутнага капіталу, сказаў ён. У цяперашні час рэгулятар ажыццяўляе штодзённы маніторынг, пры гэтым ацэньваюцца як аб'ёмы крэдытаў, якія выдаюцца, так і іх кошт.

«Рост праблемнай запазычанасці і негатыўны сацыяльны фон не патрэбныя ні банкам, ні кліентам», - канстатаваў Сяргей Дубкоў.

Разам з тым ён удакладніў, што больш жорсткія патрабаванні да камбанкаў будуць разглядацца ў выпадку пагаршэння сітуацыі. У цяперашні жа час сітуацыя ў банкаўскай сістэме не выклікае глыбокай асцярогі Нацбанка, адзначыў Сяргей Дубкоў.

Прадстаўнік Нацбанка таксама паведаміў, што не бачыць пагрозы прытоку спекулятыўнага капіталу ў банкаўскую сістэму Беларусі ў сувязі з сітуацыяй, якая склалася ў апошні час. «Мы выбудавалі сістэму, і ў цяперашні час прыток спекулятыўнага капіталу не з'яўляецца патэнцыйнай пагрозай», - сказаў Сяргей Дубкоў.