Гродзенцаў заклікалі падтрымаць Аўтуховіча і Дашкевіча
3- 10.12.2012, 13:06
У Гродне была праведзеная акцыя падтрымкі палітычных зняволеных, якія знаходзяцца ў гарадской турме абласнога цэнтра.
Актывісты гродзенскай арганізацыі «Свабодная Беларусь» распаўсюдзілі ў горадзе ўлёткі з інфармацыяй пра Зміцера Дашкевіча і Мікалая Аўтуховіча, паведамляе сайт ffight.org.
Улёткі былі расклееныя ў ажыўленых частках Гродна, на прыпынках грамадскага транспарту і рэкламных слупах.
«У засценках гродзенскай турмы № 1 адбываюць свае незаслужаныя і надуманыя рэжымам тэрміны двое з 14 палітычных зняволеных - Мікалай Аўтуховіч і Зміцер Дашкевіч. Ім патрэбная падтрымка лістамі і тэлеграмамі, напісанымі вамі», - гаворыцца ў іх.
Нагадаем, прадпрымальнік з Ваўкавыска Мікалай Аўтуховіч быў асуджаны на 5 гадоў і 2 месяцы пазбаўлення волі па абвінавачванні ў незаконным абарачэнні са зброяй. Ён сваёй віны ў судзе не прызнаў і заявіў, што яго пераследуюць за антыкарупцыйную дзейнасць.
Зміцер Дашкевіч быў асуджаны на 2 гады пазбаўлення волі па абвінавачванні ў хуліганстве, нібыта здзейсненым за дзень да прэзідэнцкіх выбараў 2010 года. Тэрмін пакарання павінен быў скончыцца ў гэтым годзе 18 снежня, але ў жніўні палітвязня зноў асудзілі і дадалі год за непадпарадкаванне, да таго ж адправілі з калоніі ў турму. Цяпер ён сядзіць у адзіночнай камеры.