Януковіч адмяніў візіт у Маскву
20- 18.12.2012, 13:28
Адной з прычын пераносу мог стаць скандал, які ўзнік у сувязі з чуткамі аб меркаваным уступленні Украіны ў Мытны саюз.
«Для паспяховай рэалізацыі гэтых дамоўленасцей неабходныя дадатковыя кансультацыі на экспертным узроўні. У сувязі з гэтым бакі дамовіліся аб пераносе тэрмінаў візіту», - перадае РІА Новости са спасылкай на прэс-службу ўкраінскага прэзідэнта.
«Тэмамі сустрэчы прэзідэнтаў Украіны і Расеі вызначаныя актуальныя пытанні ўкраінска-расейскага супрацоўніцтва, перш за ўсё ў энергетычнай і гандлёва-эканамічнай сферах. У прыватнасці - выпрацоўка ўзаемапрымальнага механізму ўзаемадзеяння Украіны з Мытным саюзам Расеі, Беларусі і Казахстана. Для паспяховай рэалізацыі гэтых дамоўленасцей неабходныя дадатковыя кансультацыі на экспертным узроўні. У сувязі з гэтым бакі дамовіліся аб пераносе тэрмінаў візіту», - гаворыцца ў рэлізе.
Напярэдадні прэс-служба Крамля паведаміла, што прэзідэнт РФ Уладзімір Пуцін у аўторак абмяркуе гандлёва-эканамічнае ўзаемадзеянне Расеі і Украіны са сваім украінскім калегам Віктарам Януковічам, які будзе знаходзіцца ў Маскве з рабочым візітам. У сваю чаргу, прэс-служба ўкраінскага прэзідэнта паведаміла, што на перамовах, як чакаецца, будзе нададзена ўвага «выпрацоўцы ўзаемапрымальнага механізму ўзаемадзеяння Украіны з Мытным саюзам Расеі, Беларусі і Казахстана».
Украінскія СМІ ў мінулыя выходныя паведамілі, што прэзідэнт Украіны можа ў аўторак падпісаць у Маскве канкрэтныя дакументы адносна супрацоўніцтва Кіева з Мытным саюзам і атрымаць у выніку зніжку на газ. Такая інфармацыя выклікала абурэнне апазіцыйных сіл, якія асцерагаюцца змены знешнепалітычнага вектара Украіны ад Еўропы ў бок МС.
Украіна ўжо больш за два гады спрабуе перагледзець дзеючыя газавыя дамовы з Расеяй, называючы кошт завышаным, а самі кантракты - кабальнымі. У гэтых умовах краіна шукае альтэрнатыўныя крыніцы паставак, у прыватнасці, заключыла кантракт з нямецкай RWE. Пастаўкі з Еўропы ў рэверсным рэжыме стартавалі з пачатку лістапада, у 2013 годзе «Нафтагаз» плануе атрымаць у рамках кантракту з RWE прыкладна 5 мільярдаў кубаметраў газу.