У Беларусі з'явіцца новы аператар сувязі - beCloud

Вядомы расейскі прадпрымальнік Канстанцін Нікалаеў і яго партнёры інвестуюць у стварэнне новага аператара сувязі beСloud.

Юрыдычная назва прадпрыемства будзе гучаць як СТАА «Беларускія хмарныя тэхналогіі». Пра гэта гаворыцца ў прэс-рэлізе Нацыянальнага цэнтра абмену трафікам (НЦАТ), распаўсюджанай сёння, піша TUT.by.

13 снежня 2012 года ўступіў у сілу Указ № 556 «Аб умовах рэалізацыі інвестыцыйнага праекта ў сферы інфармацыйна-камунікацыйных тэхналогій». Як гаворыцца ў дакуменце, ён быў прыняты ў «мэтах развіцця ў Рэспубліцы Беларусь інфармацыйна-камунікацыйнай інфраструктуры і рынку тэлекамунікацыйных паслуг».

Большая частка тэксту ўказу (пункты 1-12, 14) схаваная грыфам «Для службовага карыстання», што паслужыла падставай для мноства чутак і плётак у Байнэце. Дакладна вядома з яго было толькі адно: у рэспубліцы будзе створана сумеснае таварыства з абмежаванай адказнасцю «Беларускія хмарныя тэхналогіі». Агенцтва фінансавых навінаў AFN.BY выказала меркаванне, што гэтая кампанія будзе займацца стварэннем закрытай мабільнай сеткі для чыноўнікаў. НЦАТ рашуча абверг гэтую інфармацыю.

У Нацыянальным цэнтры абмену трафікам растлумачылі, што аб'ектамі інвестыцыйнай дзейнасці ствараемага прадпрыемства з'яўляецца стварэнне апорнай сеткі для Адзінай рэспубліканскай сеткі перадачы дадзеных, рэспубліканскага цэнтра апрацоўкі дадзеных, сеткі па тэхналогіі LTE, а таксама транзітнай магістралі сувязі па тэрыторыі Рэспублікі Беларусь.

На пытанне, ці будзе beCloud мець якое-небудзь дачыненне да будаўніцтва LTE-сеткі ад кампаніі Diallog, планы аб запуску якой былі агучаныя ўчора, першы намеснік дырэктара НЦАТ Сяргей Паблагуеў адказаў:

«Не, гэта будзе асобная сетка, асобная структура. Кампанія beCloud будзе паўнавартасным аператарам сувязі».

Акрамя таго, НЦАТ паведамляе, што на падставе гэтага ўказа 19 снежня 2012 года Рэспублікай Беларусь была падпісаная інвестыцыйная дамова аб рэалізацыі інвестпраекта «Стварэнне і эксплуатацыя аб'ектаў інфармацыйна-камунікацыйнай інфраструктуры з выкарыстаннем найноўшых тэлекамунікацыйных тэхналогій і тэхналогій апрацоўкі дадзеных». Менавіта ў рамках гэтай інвестыцыйнай дамовы будзе створана сумеснае таварыства з абмежаванай адказнасцю «Беларускія хмарныя тэхналогіі» (англійская назва beСloud), якое ажыццявіць рэалізацыю гэтага праекта.

З беларускага боку заснавальнікам СТАА «Беларускія хмарныя тэхналогіі» выступіць РУП «Нацыянальны цэнтр абмену трафікам», якому будзе належаць 51% ад статутнай долі капіталу.

Асноўным удзельнікам з боку інвестара выступае вядомы расейскі бізнесмен Канстанцін Нікалаеў, мінарытарнымі ўдзельнікамі - яго бізнэс-партнёры.

Сума меркаваных інвестыцый не выдаецца.