Абама вызначыўся з наступным дзяржсакратаром

Прэзідэнт ЗША Барак Абама выставіць кандыдатуру сэнатара ад Масачусэтса Джона Кэры, які ўзначальвае замежнапалітычны камітэт, на пасаду дзяржаўнага сакратара.

Пра гэта паведамляе Lenta.Ru са спасылкай на Белы дом. Зацвердзіць прызначэнне павінен будзе Сэнат, пры гэтым адказным будзе камітэт, які ўзначальвае сам Кэры. Бліжэйшае пасяджэнне Сэната адбудзецца не раней за 3 студзеня.

Як піша The Boston Globe, Абама першапачаткова планаваў выставіць адначасова кандыдатуры яшчэ на дзве пасады - кіраўніка міністэрства абароны і кіраўніка ЦВА, але праз бясконцыя пытанні ў выніку пастанавіў абмежавацца дзяржсакратаром.

Пасля адмовы сталага прадстаўніка ЗША пры ААН Сьюзан Райс вылучацца на пасаду дзяржсакратара СМІ пісалі пра двух магчымых кандыдатаў - Джона Кэры і дарадцу прэзідэнта ЗША ў нацыянальнай бяспецы Томаса Донілана.

69-гадовы Джон Кэры з 1985 года з'яўляецца сэнатарам ад Масачусэтса (спачатку малодшым, а з 2009 года - старшым). Дагэтуль з 1983 да 1985 года ён быў губернатарам штата. Кэры ваяваў у В'етнаме, даслужыўся да рангу лейтэнанта.

У 2004 годзе ён балатаваўся на пасаду прэзідэнта ЗША ад Дэмакратычнай партыі, аднак саступіў рэспубліканцу Джорджу Бушу-малодшаму.

Цягам першага тэрміну Барака Абамы Дзяржаўны дэпартамент ЗША ўзначальвала Гілары Клінтан. Яна неаднаразова казала, што пасля прэзідэнцкіх выбараў пакіне сваю пасаду.