У Магілёве на Лукашэнку могуць упасці сцены фабрыкі «IKEA»

Такую заклапочанасць выказаў актывіст незалежнага прафсаюза РЭП Аляксей Паўлоўскі.

Каб папярэдзіць магчымую трагедыю, ён выслаў адпаведны ліст на адрас адміністрацыі Лукашэнкі.

«Гэтая тэма вельмі актуальная, так як прэзідэнт ажыццяўляе рабочыя візіты на дрэваапрацоўчыя прадпрыемствы краіны. Мой абавязак грамадзяніна - папярэдзіць трагедыю, таму што будаўніцтва на дадзеным аб'екце вялося з парушэннямі тэхнікі бяспекі. Я рэкамендаваў прэзідэнту ўстрымацца ад наведвання гэтага аб'екта, пакуль спецыялістамі не будзе праведзена ацэнка якасці мацавання сцен да калон», - сказаў Аляксей Паўлоўскі ў інтэрв'ю charter97.org.

Варта адзначыць, што заказчыкам дадзенага аб'екта выступіла замежнае прадпрыемства «ВМГ-індустры». Аб'ект меў назву «Вертыкальна-інтэграваны дрэваапрацоўчы комплекс па вуліцы Шміта ў Магілёве». Будаўнічая арганізацыя ААТ «Прамжылбуд» з'яўлялася субпадрадчыкам і узводзіла на гэтым аб'екце цагляныя сцены.

Прафсаюзны актывіст тлумачыць, што для стварэння спрыяльных умоў інвестарам Лукашэнкі былі забароненыя праверкі будоўляў рознымі дзяржаўнымі кантралюючымі арганізацыямі. Гэта прывяло да пастаяннага парушэння тэхнікі бяспекі на будаўнічых пляцоўках і парушэння тэхналогіі вытворчасці будаўнічых работ.

«Яшчэ працуючы ў «Прамжылбудзе» муляром, я папярэджваў сваё кіраўніцтва аб недапушчальнасці парушэння будаўнічых нормаў у частцы мацавання сцен да калон. Я пісаў ліст у аблвыканкам, дзе паказваў дапушчаныя парушэнні пры будаўніцтве і да чаго яны могуць прывесці. У чэрвені быў моцны вецер і адна са сцен не вытрымала такой нагрузкі і звалілася. Па шчаслівай выпадковасці быў выходны дзень і будаўнічыя працы на аб'екце не вяліся, таму ніхто не пацярпеў», - кажа Аляксей Паўлоўскі.

Рабочы-муляр адзначае, што ў яго распараджэнне патрапілі фатаграфіі, якія цалкам пацвярджаюць факт падзення сцяны.

«Я напісаў ліст пракурору Магілёўшчыны Эдуарду Сянкевічу, што сцены на будоўлі падаюць, а ён не робіць ніякіх дзеянняў. На мой зварот ён даў цынічную адпіску - прайшла праверка, фактаў падзення сцяны не ўстаноўлена», - працягвае Аляксей Паўлоўскі.

На прыёме ў старшыні Магілёўскага гарвыканкама Станіслава Барадаўкі рабочы-муляр таксама ўздымаў гэтую праблему. Да свайго здзіўлення ён даведаўся, што і мэр не ў курсе таго, што робіцца ў горадзе, што сцены падаюць, а ніхто не нясе за гэта ніякай адказнасці.

Нагадаем, што з рабочым-муляром Аляксеем Паўлоўскім, які працаваў у будаўнічай арганізацыі «Прамжылбуд», не быў працягнуты працоўны кантракт. Прафсаюзны актывіст лічыць, што гэта стала вынікам яго актыўнай прафсаюзнай дзейнасці ўнутры будаўнічай арганізацыі. Праз суд ён змог змяніць фармулёўку свайго звальнення, згодна з якой ён быў звольнены з-за парушэння працоўнага заканадаўства наймальнікам і адсудзіць у яго амаль 12 мільёнаў рублёў.