Садысты з Ленінскага РУУС да гэтага часу на свабодзе

Абвінавачванне па справе аб перавышэнні службовых паўнамоцтваў у РУУС Ленінскага раёна Менска пакуль не прад'яўлена.

«Нікому з супрацоўнікаў органаў унутраных спраў абвінавачанне па крымінальнай справе, узбуджанай па факце перавышэння службовых паўнамоцтваў, яшчэ не прад'яўлена», - паведаміў агенцтву «Інтэрфакс-Захад» у чацвер начальнік аддзела інфармацыі і сувязі з грамадскасцю Следчага камітэта Беларусі падпалкоўнік юстыцыі Павел Траулька.

«У рамках расследавання дадзенай крымінальнай справы, 5 снежня ўпраўленне СК па Менску правяло праверку паказанняў пацярпелага на месцы», - праінфармаваў начальнік аддзела. Іншыя падрабязнасці гэтай крымінальнай справы Траулька паведаміць адмовіўся, спаслаўшыся на таямніцу следства.

Па выніках праверкі заявы Васіля Сарочыка, УСК па Менску 1 снежня 2012 года ўзбудзіла крымінальную справу па ч.3 арт.426 КК (перавышэнне ўлады або службовых паўнамоцтваў, учыненыя службовай асобай, якія відавочна выходзяць за межы праў і паўнамоцтваў, прадстаўленых па службе).

«У рамках расследавання крымінальнай справы праводзяцца неабходныя следчыя дзеянні, накіраваныя на ўстанаўленне ўсіх акалічнасцей сітуацыі. Прызначаны шэраг экспертных даследаванняў», - адзначылі ў Следчым камітэце.

Раней паведамлялася, што каля двух тыдняў таму ў Інтэрнэце быў размешчаны відэазапіс, на якім мужчына, які прадставіўся вартаўніком адной з менскіх аўтастаянак, распавядае, як яго даставілі ў дзяжурную частку Ленінскага РУУС і вялі допыт з прымяненнем сілы.

Менчук звярнуўся ў пракуратуру з заявай, яго заява была прынятая, па ёй вынесена пастанова аб прызначэнні судова-медыцынскай экспертызы. У адпаведнасці з патрабаваннямі Крымінальна-працэсуальнага кодэкса, матэрыялы для правядзення паверкі былі накіраваныя ў Ленінскі раённы аддзел СК па Менску.