Супраць дэманстрантаў у Каіры кінулі танкі

Вайскоўцы ў Каіры адціскаюць дэманстрантаў і журналістаў ад прэзідэнцкага палаца.

Гэтую акцыю пастанавілі правесці пасля сутыкненняў, што доўжыліся ўсю ноч, паміж прыхільнікамі і праціўнікамі прэзідэнта Махамеда Мурсі, падчас якіх пяць чалавек загінулі і больш за 600 атрымалі раны, паведамляе ВВС.

Аперацыя пачалася пасля таго, як скончыўся тэрмін, да якога дэманстрантам прапанавана было пакінуць плошчу перад палацам.

Між тым універсітэт Аль-Азхар, які з'яўляецца вышэйшым духоўным аўтарытэтам краіны, заклікаў прэзідэнта Мурсі скасаваць указ, які надае яму адмысловыя паўнамоцтвы, і пачаць дыялог без папярэдніх умоў са сваімі апанентамі.

Пытанне ўлады

Прэзідэнт Мурсі ўласным указам ад 22 лістапада надаў сябе дадатковыя паўнамоцтвы і пазбавіў судовыя органы магчымасці аспрэчваць або касаваць ягоныя пастановы.

Са слоў Мурсі, які з невялікай перавагай перамог на першых свабодных прэзідэнцкіх выбарах у краіне, ён гатовы адмовіцца ад дадатковых паўнамоцтваў, як толькі будзе прынятая новая канстытуцыя.

Аднак сама канстытуцыя выклікае нямала спрэчак. Крытыкі сцвярджаюць, што законапраект быў спехам прыняты парламентам без належных кансультацый і не гарантуе поўных палітычных і рэлігійных свабод, а таксама правоў жанчын.

Урад, нягледзячы на патрабаванні апазіцыі, намагае правядзення рэферэндуму паводле чарнавога варыянту канстытуцыі, які быў укладзены пераважна ісламістамі, што падтрымліваюць Мурсі.

Чацвёра дарадцаў Мурсі ў сераду падалі ў адстаўку ў знак пратэсту супраць пастаноў улады. Раней ад сваіх пасадаў ўжо адмовіліся трое дарадцаў, і іхныя прыклады могуць пераняць новыя людзі з атачэння прэзідэнта.

Камень - зброя дэманстранта

У чацвер, пасля распачатых на пляцы перад прэзідэнцкім палацам беспарадкаў, армія задзейнічала танкі і бронемашыны.

Начальнік Рэспубліканскай гвардыі Егіпта заявіў, што перад войскамі пастаўлена задача не дапускаць сутыкненняў паміж праціўнікамі і прыхільнікамі прэзідэнта Мурсі.

Генерал Махамед Закі заклікаў да спакою і паабяцаў, што «ўзброеныя сілы і іхны авангард - Рэспубліканская гвардыя - не будуць выкарыстоўвацца як інструмент уціску пратэстаў».

Аднак паміж прысутнымі час ад часу пачынаюцца сутычкі, і яны кідаюць адзін у аднаго камяні.

Гэтыя сутыкненні сведчаць аб паглыбленні палітычнага крызісу ў краіне.

Хваля гвалту, якую, са слоў лідараў апазіцыі, ініцыявала партыя Мурсі «Браты-мусульмане», да болю нагадвае тактыку, якую ўжываў падчас рэвалюцыі былы прэзідэнт Егіпта Хосні Мубарак.

Весткі аб беспарадках прыходзяць і з іншых гарадоў: напады на штаб-кватэры «Братоў-мусульман» адбыліся ў Ісмаіле і Суэцы.

Выступаючы ў сераду, віцэ-прэзідэнт Махмуд Мекі пацвердзіў, што галасаванне аб законапраекце канстытуцыі запланаванае на 15 снежня, аднак адзначыў, што «дзверы для дыялогу» застаюцца адчыненымі, даўшы тым самым зразумець, што ў дакумент пасля могуць быць унесеныя змены.

Але хоць урад гаворыць пра неабходнасць дыялогу, напраўду не ідзе на саступкі, якія маглі б пакласці канец палітычнаму крызісу ў краіне.