Тэатр Блумсберы вымушаны апраўдвацца за выступ Купалаўскага тэатра

Лонданскі тэатр Блумсберы адрэагаваў на абурэнне, выкліканае запрашэннем тэатра імя Янкі Купалы ў Вялікабрытанію.

«Тэатр Блумсберы прадаставіў магчымасць дабрачыннага выступу беларускаму тэатру імя Янкі Купалы з мэтай прасоўвання культурнай спадчыны Беларусі па просьбе беларускай амбасады. Тэатр не прымаў удзелу ў стварэнні спектакля і падрыхтоўцы да яго паказу, спектакль не ўваходзіў у абвешчаную праграму мерапрыемстваў, - гаворыцца ў заяве тэатра Блумсберы. - Падаючы магчымасць арэнды памяшканняў, мы не мелі намераў рабіць палітычныя заявы і, тым больш, падтрымліваць і заахвочваць беларускі рэжым».

Выступленне тэатра імя Янкі Купалы, якое прайшло 10 мая ў Лондане, выклікала абурэнне сярод шматлікіх прыхільнікаў тэатра. Наведвальнікі старонкі тэатра Блумсберы ў «Фэйсбуку» назвалі гэтую падзею ганьбай і распавялі пра рэпрэсіі, якім падвяргаюцца жыхары Беларусі, а таксама, аб тым, што ў краіне неаднаразова затрымлівалі людзей за наведванне спектакляў Свабоднага тэатра, які вымушаны выступаць у падполлі.

У дзень выступу тэатра імя Янкі Купалы Міжнародны камітэт за свабоду артыстаў правёў акцыю ў Лондане ў падтрымку беларускіх незалежных дзеячаў мастацтва.