Asharq Alawsat: Сірыйскі амбасадар у Менску перайшоў на бок апазіцыі

Вядучае еўрапейскае арабскае выданне пацвердзіла інфармацыю charter97.org.

Уцёкі высокапастаўленых чыноўнікаў сірыйскага рэжыму працягваюцца. Лонданская газета Asharq Alawsat пацвердзіла інфармацыю пра ўцёкі на Захад амбасадара Сірыі ў Менску Фарука Таха. Таксама яна паведаміла аб тым, што дыпламат перайшоў на бок апазіцыі. Ён зрабіў гэта па прыкладзе кіраўніка дыпламатычнай місіі ў Іраку Навафа аль-Фарыса.

Як паведамілі газеце крыніцы ў апазіцыйным Сірыйскім нацыянальным савеце, амбасадара ў Беларусі павінны былі адклікаць у Дамаск. Аднак ён адмовіўся вяртацца на радзіму. Дзе дыпламат знаходзіцца цяпер, у публікацыі не паведамляецца.

Між тым, аль-Фарыс, які атрымаў часовы прытулак у Катары, заклікаў міжнародную супольнасць да ўзброенай інтэрвенцыі ў Сірыі. Паводле яго слоў, Башар Асад атрымаў у спадчыну жорсткасць свайго бацькі і папярэдніка Хафіза і гатовы на ўсё для захавання ўлады.

Дыпламат таксама прызнаўся, што пасля амерыканскага ўварвання ў Ірак у 2003 годзе каардынаваў адпраўку ў гэтую краіну сірыйскіх баявікоў. Пасля пачатку паўстання ў Сірыі тэрарысты, якія валодаюць вопытам баёў з амерыканскімі салдатамі, вярнуліся дадому.

Паводле слоў Фарыса, рэжым выкарыстоўвае звязаных з «Аль-Каідай» тэрарыстаў ва ўласных мэтах - па загадзе ўлад яны праводзяць тэракты, у якіх потым абвінавачваюць праціўнікаў Асада.

Як раней паведаміла сайту charter97.org крыніца, амбасадар Сірыі ў Менску Фарук Таха, які працаваў у Беларусі з 2007 года, таксама збег у адну з краін Еўропы. У СМІ паведамлялася аб заканчэнні паўнамоцтваў дыпламата. Аднак, як паведаміла крыніца, на самой справе Фарук Таха не вярнуўся ў Дамаск. Яшчэ вясной ён збег з Менска ў адну з краін Еўропы, як мяркуецца, у Швейцарыю. Гэтая інфармацыя замоўчвалася. Беларускія і сірыйскія ўлады, мабыць, вырашылі не афішаваць уцёкі свайго дыпламата.