Аўтуховіча пазбавілі спаткання з жонкай

Асуджаны ваўкавыскі прадпрымальнік Мікалай Аўтуховіч можа не атрымаць прызначанага спаткання з дачкой і жонкай, якое планавалася ў канцы ліпеня.

Пра гэта паведаміў БелаПАН праваабаронца Алег Волчак.

«Я разлічваў, што з Польшчы прыедзе мая дачка, і жонка разам з ёй прыедуць да мяне на спатканне ў канцы ліпеня. Аднак не заўсёды атрымліваецца, як ты плануеш. Я яшчэ дакладна не ведаю, але мне ўжо расказалі, што спаткання з жонкай у ліпені не будзе. Толькі праз паўгады пасля апошняга спаткання. А да гэтага казалі, што няма ніякіх перашкод. Я яшчэ раз звярнуўся з запытам, ці канчатковае гэта рашэнне. Буду чакаць адказ», — напісаў прадпрымальнік у лісце Вользе Нікалайчык, рэжысёру фільма «Вандроўка па бясконцай вайне», прысвечанага Аўтуховічу.

Як адзначыў Волчак, падчас апошняга спаткання з маці ў яе адмовіліся прыняць прадуктовую перадачу для Аўтуховіча. З гэтай нагоды ваўкавыскі прадпрымальнік напісаў: «Разумею, што не проста так адмовілі маці ў перадачы прадуктаў, бо ўсё да гэтага спаткання было дамоўлена з усімі. Але гэтым разам перадачу не забароняць, бо паводле закона я магу атрымаць яе амбасадару 25 ліпеня. Вось толькі не ўбачу жонку і дачку».

«Я лічу, што хтосьці наверсе стварае выпрабаванні, хоча да чаго-та падштурхнуць. Дурні, калі думаюць так на мяне націснуць. Я ніколі не зракуся ад сваіх жыццёвых паглядаў і прынцыпаў», — піша Аўтуховіч.

Як адзначыў Волчак, яму незразумела, чаму Аўтуховіча пазбываюць сустрэчы з жонкай і дачкой. «Да гэтага ў яго ішло ўсё добра, заўваг з боку адміністрацыі турмы не было. Мікалай нават пісаў пару месяцаў назад жонцы, што яму зменяць рэжым на мякчэйшы. Ствараецца ўражанне, што хтосьці наўмысна нагнятае становішча вакол палітвязняў перад амністыяй. Аўтуховіч як ветэран баявых дзеянняў у Афганістане, які мае ўрадавыя ўзнагароды, праблемы са здароўем, павінен трапіць пад амністыю. Можа быць, таму вакол яго ствараюць нервовасць, каб справакаваць на нейкія дзеянні», — лічыць Волчак.

У траўні 2010 года Аўтуховіч рашэннем Вярхоўнага суда быў прысуджаны да пяці гадоў і двум месяцаў пазбаўлення волі з адбываннем кары ў калоніі строгага рэжыму за перавозку і захоўванне пяці патронаў ад паляўнічай вінтоўкі. 17 студзеня ў івацэвіцкай калоніі № 5 адбыўся суд над прадпрымальнікам у сувязі з парушэннем ім рэжыму ўтрымання. Суд прызнаў яго вінаватым у злосным парушэнні рэжыму. Цяпер Аўтуховіч знаходзіцца ў турме № 1 Гародня ў двухмеснай камеры.

Праваабаронцы лічаць Аўтуховіча палітвязнем, паказваючы на сур'ёзныя працэсуальныя парушэнні, зафіксаваныя падчас суда.