У Слуцку ідэолаг нацкаваў на зборшчыкаў подпісаў міліцыю

Пікет па збору подпісаў выклікаў нечаканую рэакцыю намесніка старшыні Слуцкага райвыканкама па ідэалогіі.

На пікеце, які праходзіў каля ўнівермага «Слуцк» збіралі подпісы за вылучэнне кандыдатам у «дэпутаты» актывіста «Гавары праўду» Аляксандра Солапа. Як распавяла кіраўнік яго ініцыятыўнай групы Юлія Балакірава, каля 12.30 да яе падышла жанчына, якая схапіла стэнд з інфармацыяй і аднесла яго ў бок. «Каб на маёй тэрыторыі гэта не стаяла», - заявіла дама, якая, відавочна, прадстаўляла адміністрацыю крамы, паведамляе ПЦ «Вясна».

«Я растлумачыла ёй, што закон не парушаю, і прапанавала вырашыць канфлікт з дапамогай міліцыі», - кажа Юлія Балакірава.

Незнаёмка сышла, а праз некалькі хвілін на яе месцы з'явілася намеснік старшыні выканкама па ідэалогіі Ларыса Дабравольская. Яна ўважліва разгледзела стэнд, адышла ў бок і кудысьці патэлефанавала.

Неўзабаве да Юліі Балакіравай падышоў мужчына ў цывільным, які прадставіўся супрацоўнікам Слуцкага РАУС, але пасведчанне не паказаў.

Затое ён папрасіў прад'явіць дакументы Юлію. Акрамя таго, таварыша ў цывільным цікавілі падпісныя лісты.

«Пакажыце іх мне, я хачу праверыць, ці ёсць у вас там «мёртвыя душы», - сказаў ён.

Кіраўнік ініцыятыўнай групы патлумачыла, што гэтым павінен займацца не міліцыянт, а акруговая камісія.

«Потым ён запатрабаваў убраць са стэнда герб Слуцка. З яго слоў, па рашэнні райвыканкама прэтэндэнт у кандыдаты не мае права яго выкарыстоўваць. «Я цябе папярэдзіў», - з гэтымі словамі міліцыянт сышоў.