Віцебскі чыноўнік «пагарэў» на феерверках

У Менску ўсё ж такі пачалося пасяджэнне па крымінальнай справе ў дачыненні да былога намесніка старшыні Віцебскага аблвыканкама Леаніда Кавалёва.

Сёння быў дапытаны сведка - былы кіраўнік упраўлення культуры Віцебскага аблвыканкама. Суддзя і дзяржабвінаваўца досыць падрабязна апыталі сведку з нагоды механізму ўзгаднення Кавалёвым каштарысаў на правядзенне масавых мерапрыемстваў. Акрамя таго, пытанні экс-кіраўніку ўпраўлення культуры задаваў і сам Леанід Кавалёў, перадае БелТА.

У тым ліку ўдзельнікі працэсу распытвалі былога кіраўніка ўпраўлення культуры аб дэталях супрацоўніцтва мясцовых уладаў з віцебскай фірмай, якая арганізуе феерверкі. Па словах экс-начальніка ўпраўлення, гэтая фірма пачала працаваць з аблвыканкамам прыкладна з 2007 года і была фактычна манапалістам у сваёй сферы на тэрыторыі вобласці.

Адносна сваіх узаемаадносін з Кавалёвым сведка заявіў: «У нас былі службовыя кантакты».

Што датычыцца другога абвінавачанага - Коола Гунара, то на сённяшнім пасяджэнні аб ім размова не ішла. З'яўляецца ён грамадзянінам Беларусі ці іншай краіны, пакуль незразумела. Таксама бок дзяржабвінавачання зараз устрымліваецца ад якіх-небудзь каментароў па гэтым працэсе і не паведамляе, па якіх артыкулах абвінавачваюцца фігуранты справы. Акрамя таго, адвакат Коола Гунара на гэтым этапе працэсу таксама не пажадаў мець зносіны з прэсай.

Нагадаем, экс-намесніка старшыні Віцебскага аблвыканкама Леаніда Кавалёва затрымалі каля года таму. Афіцыйна ні адно сілавое ведамства гэта не пацвердзіла. Ад незалежных журналістаў хавалі інфармацыю пра дату і месца разгляду справы чыноўніка.