Яўку завышаюць амаль на ўсіх участках

Самыя характэрныя парушэнні на датэрміновых «выбарах» - завышэнне яўкі і непадаванне спісаў выбаршчыкаў.

Пра гэта БелаПАН заявіў прэс-сакратар кампаніі «За свабодныя выбары» Анатоль Гуляеў.

Паводле яго слоў, назіральнікі практычна паўсюдна фіксуюць завышэнне яўкі выбаршчыкаў. «Характэрна ў гэтым сэнсе Магілёўская-Цэнтральная выбарчая акруга № 85. Там на ўчастку № 56 па стане на 18 верасня назіральнікі зафіксавалі яўку 74 чалавек, па дадзеных камісіі, прагаласавалі 137. Па 60-м участку ў той жа акрузе яўка назіральнікамі зафіксавана 5 чалавек , па дадзеных камісіі - 33. Участак № 61 - назіральнікі зафіксавалі 18 тых, хто прагаласаваў, камісія - 27. Гэта значыць яўка адрозніваецца ў разы», - распавёў Гуляеў.

Акрамя таго, адзначыў ён, на 45% кантрольных участкаў назіральнікам адмовіліся даць спісы выбаршчыкаў. «Гэта больш чым 260 участкаў», - падкрэсліў Гуляеў. Паводле яго слоў, «калі раней гэтыя спісы вывешваліся для агляду, то цяпер - не». «Гэта значыць, ты мог прыйсці на ўчастак і ўбачыць там прозвішча суседа, які, скажам, памёр два гады таму, і папрасіць камісію выправіць недакладнасць. Зараз жа выбаршчыку даюць паглядзець толькі сваё прозвішча ў спісе галасавання, запатрабаваць выпраўлення памылак ужо нельга», - растлумачыў Гуляеў.

Па дадзеных праекта «Назіранне за выбарамі: тэорыя і практыка», на выбарчым участку № 449 па Кальварыйскай выбарчай акрузе № 104 назіральнікі зафіксавалі завышэнне яўкі выбаршчыкаў. 18 верасня тут прагаласавалі 6 чалавек, а камісія зафіксавала яўку 66 чалавек.

У сваю чаргу, кампанія «Праваабаронцы за свабодныя выбары» паведамляе, што участковая камісія № 126 па Свіслацкай акрузе № 94 распячатвала ўрну датэрміновага галасавання пасля закрыцця выбарчага ўчастка.

«Учора ў 19.00 урна для галасавання была апячатана, назіральнікі сышлі з участку. Сёння стала вядома, што пасля закрыцця ўчастка прыйшлі яшчэ тры выбаршчыка. Члены камісіі спасылаюцца, што гэта былі людзі сталага ўзросту, таму для іх распячаталі скрыню і дазволілі ім прагаласаваць пасля афіцыйнага закрыцця ўчастка. Пры гэтым прозвішчы выбаршчыкаў былі ўнесены ў пратакол сённяшняга дня», - паведамляюць праваабаронцы.