У яшчэ адной грузінскай турме выявілі супрацоўнікаў-садыстаў

Галоўная пракуратура Грузіі выявіла факты здзекаў над зняволенымі Кутаіскай турмы N16.

Пра гэта паведамляе сайт «Навіны-Грузія».

У ліку затрыманых апынуўся дырэктар папраўчай установы - Зураб Рухая. Разам з ім пад варту былі ўзятыя начальнік рэжыму Давід Нарсія і дзяжурныя інспектары Нікалоза Вахтангішвілі і Георгія Грдзелідзэ, паведаміў на брыфінгу пракурор Шота Ткешэлашвілі. Паводле яго слоў, гэтыя супрацоўнікі былі абвінавачаныя ў катаваннях зняволеных, у тым ліку мелі месца і згвалтаванні. Усім чатыром прад'яўленае абвінавачванне па артыкуле 144-1 КК Грузіі («катаванні»).

Кутаіская турма - ужо другая па ліку папраўчая ўстанова краіны, у якой былі выкрытыя факты катаванняў. Раней у інтэрнэце з'явіліся відэазапісы здзекаў наглядчыкаў Глданскай турмы над вязнямі. На відэа ахоўнікі гвалцяць зняволеных гумовымі дубінкамі і венікам. Таксама ёсць кадры, дзе вялікая група ахоўнікаў па чарзе збівае зняволеных.

Па факце здзекаў, у гэтай турме былі затрыманыя 12 яе супрацоўнікаў. Таксама ў адстаўку былі вымушаныя сысці кіраўнік МУС Бачо Ахалая і міністр па выкананні пакаранняў Хатуна Калмахелідзэ.