У Лукашэнкі і Кім Чэн Ына агульныя спічрайтэры?

Навагодні зварот - спецыфічны жанр.

Ад яго не варта чакаць якіх-небудзь адкрыццяў, хоць у мінулыя гады былі спробы разгледзець паміж словамі Аляксандра Лукашэнкі падказы  аб ягоных бліжэйшых планах, піша «Салiдарнасць».

На гэты раз найбольшую ўвагу прывабіла нават не сказанае правадыром, а ягоныя сямейныя фота, якія быццам незнарок з'явіліся на другім плане. На форумах і ў сацыяльных сетках ужо разгарнуліся дыскусіі на тэму «Што б гэта значыла?».

Паралельна ўпершыню за 19 гадоў павіншаваў сваю краіну з Новым годам лідар КНДР. Параўнанне тэкстаў выступаў Кім Чэн Ына і Аляксандра Лукашэнкі выявіла цэлы шэраг супадзенняў.

Лукашэнка: [У гэтым годзе мы] Узнялі на новы ўзровень ахову здароўя, адукацыю. (Няўжо ж?! - А.С.)

Кім: У мінулым годзе з прыняццем Закона аб увядзенні ўсеагульнага 12-гадовага абавязковага навучання яшчэ больш умацавалася перадавая сацыялістычная сістэма адукацыі.

Лукашэнка: Нашы студэнты, школьнікі, артысты і нават спартоўцы ўславілі Беларусь сваімі перамогамі на сусветнай арэне.

Кім: Нашы спартоўцы сваімі значнымі поспехамі ўславілі гонар Радзімы на міжнародных спаборніцтвах.

Лукашэнка: [У гэтым годзе мы] Сталі касмічнай дзяржавай...

Кім: Нашы слаўныя навукоўцы і спецыялісты, якія паспяхова запусцілі штучны спадарожнік Зямлі «Кванмэнсан-3» № 2, бліскуча выканалі запаветы вялікага Кім Чэн Іра і навочна прадэманстравалі ўзровень развіцця касмічнай навукі і тэхналогіі чучхэйскай Карэі і сукупнасць яе дзяржаўных сіл.

Лукашэнка: Наступны год стане пераломным для эканомікі. У нас няма іншага выбару, бо якаснае абнаўленне і паскораная мадэрнізацыя прадпрыемстваў - зарука ўмацавання нашай дзяржаўнасці і росту дабрабыту народа.

Кім: Новы, 2013 год - гэта год грандыёзнага стварэння і велізарных перамен, у гэтым годзе варта пераламаць сітуацыю ў будаўніцтве магутнай і квітучай сацыялістычнай дзяржавы... у будаўніцтве эканамічнай дзяржавы, у паляпшэнні дабрабыту насельніцтва.

Ну і гэтак далей.

Увогуле, на гэты момант у нас вызначаецца «поўны Пхеньян». З папраўкай на геаграфічнае становішча краіны. На шчасце, падобныя рэжымы паступова сыходзяць з сусветнай сцэны. Адныя - раней, іншыя - пазней. Але сыходзяць неўнікнёна. І Новы год без Лукашэнкі таксама не за гарамі.