Зміцер Бандарэнка: Эканамічны крызіс правакуе агрэсію
8- 10.01.2013, 13:08
Палітычнае і эканамічнае становішча нашай краіны правакуе ўзмацненне пачуцця нестабільнасці і турботы.
Пра гэта заявіў былы палітвязень, каардынатар грамадзянскай кампаніі «Еўрапейская Беларусь» Зміцер Бандарэнка ў інтэрв'ю тэлеканалу «Белсат».
Менчук, які скончыў жыццё самагубствам і сам стаў забойцай міліцыянта, перажыў некалькі эканамічных крызісаў, падкрэсліў палітык, што, несумненна, паўплывала на яго псіхічны стан.
Прычынай смерці міліцыянта і самагубства менчука Бандарэнка назваў непрафесійныя дзеянні працаўнікоў міліцыі. «Трэба было накіроўваць групу захопу адразу», - адзначыў ён.
Былы палітвязень лічыць, што непрафесіяналізм міліцыі ідзе зверху: змены ў кіруючых шэрагах спецслужбаў не лепшым чынам адбіваюцца на ўзроўні прафесійнай падрыхтаванасці ахоўнікаў правапарадку ў Беларусі.
«Міліцыя займаецца палітычнымі справамі, яна накіраваная на гэта дыктатарам, а прафесійны ўзровень падае», - падкрэсліў Бандарэнка. У параўнанні з працаўнікамі спецслужбаў суседніх краін, адзначыў ён, у нас міліцыянты маюць самыя нізкія зарплаты, што ўплывае на адток прафесійных кадраў з органаў.
«Беларуская апазіцыя выбрала шлях негвалтоўнага супраўлення, і на гэтай аснове мы будзем стаяць. Калі ж зменіцца палітычная сітуацыя, знікне ціск, «адкрыюцца шлюзы», то ўзровень грамадскай напружанасці знізіцца», - лічыць Зміцер Бандарэнка.