У ФРГ судзяць расейскіх шпіёнаў
13- 15.01.2013, 9:57
У нямецкім Штутгарце пачынаецца суд над шлюбнай парай расейцаў, якія абвінавачваюцца ў шпіянажы.
Па версіі следства, яны працавалі ў Германіі ў якасці выведнікаў-нелегалаў яшчэ з 1980-х гадоў, паведамляе ВВС.
Расейцы заехалі ў Германію па фальшывых аўстрыйскіх пашпартах на імёны Андрэас і Хайдрун Аншлаг. Сапраўдныя імёны абвінавачаных невядомыя.
Па дадзеных пракуратуры, на працягу больш за 20 гадоў яны перадавалі савецкім, а затым расейскім уладам сакрэтную інфармацыю аб дзейнасці НАТА і Еўразвяза, а таксама кансультавалі Службу знешняй выведкі Расеі па пытаннях палітыкі і абароны Германіі.
У нямецкай прэсе паведамлялася, што Масква і Берлін спрабавалі дамовіцца аб абмене арыштаваных на дваіх расейцаў, асуджаных у Расеі за перадачу сакрэтных звестак адной з заходніх разведак, але перамовы поспехам не ўвянчаліся.
Рэха халоднай вайны
У Германіі справу шлюбнікаў-нелегалаў называюць самым гучным шпіёнскім скандалам з часоў падзення берлінскай сцяны.
У матэрыялах крымінальнай справы гаворыцца, што ў 2009 годзе Андрэас Аншлаг завербаваў галандскага дыпламата Райманда Валянціна Путэрая, у якога ён купляў дакументы НАТА і ЕЗ. За супрацоўніцтва агенту нібыта заплацілі ў агульнай колькасці 72 тысячы еўра.
Па дадзеных газеты Welt, атрыманая ад галандскага чыноўніка інфармацыя тычылася сістэмы ПРА ў Еўропе, структурных рэформаў у НАТА, а таксама ўдзелу альянсу ў канфліктах у Косава, Афганістане і Лівіі.
Андрэас Аншлаг таксама адпраўляў СВР рэкамендацыі па вярбоўцы сакрэтаносьбітаў, у тым ліку буйных чыноўнікаў урада Германіі, заяўляюць пракуроры.
У поле зроку нямецкай контрвыведкі сям'я Аншлаг патрапіла ў жніўні 2011 года, як мяркуецца, па наводцы амерыканскіх спецслужбаў.