У Алжыры скончылася спецаперацыя супраць ісламістаў
20- 19.01.2013, 18:53
Байцы алжырскага спецназа ажыццявілі штурм захопленага ісламістамі газавага радовішча, дзе тыя ўтрымлівалі ў закладніках замежнікаў.
СМІ Алжыра ды іншых краін паведамляюць са слоў прадстаўнікоў вайсковага камандавання, што падчас штурму загінулі 11 баевікоў, паведамляе ВВС.
Сем закладнікаў - усе замежнікі - былі пакараныя смерцю баявікамі як толькі войскі перайшлі да актыўных дзеянняў.
Грамадзянства забітых пакуль не ўдакладняецца. Улады Румыніі заявілі агенцтву Франс-прэс, што, магчыма, сярод пакараных ёсць грамадзянін іх краіны.
Вядома таксама, што ў руках баявікоў знаходзіліся шасцёра грамадзян Нарвегіі. Пра гэта ў суботу паведаміў кіраўнік нарвежскага нафтавага канцэрна Statoil Хелге Лунд.
Паводле звестак алжырскіх уладаў, раней вайскоўцамі былі выратаваныя 573 закладнікі-алжырцы і 100 з 132 замежнікаў.
Па-ранейшаму застаецца невядомым лёс 30 замежнікаў, уключна дзесяцёх брытанцаў.
Паводле паведамленняў дзяржаўнага алжырскага інфармацыйнага агенцтва АПС, з пачатку аперацыі ў вызваленні закладнікаў у мінулы чацвер загінулі 12 алжырскіх і замежных рабочых.
Такім чынам, усяго на гэты момант вядома пра гібель 19 закладнікаў.