Распродажам зямлі будзе займацца асабіста Лукашэнка

Кіраўнік лічыць неабходным пакінуць за сабой кантроль за выдзяленнем вялікіх плошчаў зямельных участкаў пад будаўніцтва.

«Хутчэй за ўсё, нам трэба рашэнні, якія тычацца часовага адводу земляў, адводу земляў пад лініі электраперадачы і таму падобныя аб'екты, то ёсць нязначных адводаў і якія не падлягаюць ніякаму сумневу, аддаць на ўзровень аблвыканкамаў. Але істотныя плошчы зямельных угоддзяў: лясных угоддзяў, лугоў, пашы і гэтак далей - вось гэты адвод павінен знаходзіцца пад кантролем прэзідэнта. Гэта адназначна», - заявіў Лукашэнка, сустракаючыся ў аўторак са старшынёй Дзяржаўнага камітэта па маёмасці Георгіям Кузняцовым.

Як паведамляе прэс-служба, падчас сустрэчы разглядаўся праект закона аб унясенні змяненняў і дапаўненняў у Кодэкс аб зямлі.

Пры гэтым Лукашэнка папярэдзіў чыноўнікаў аб недапушчальнасці злоўжывання ўладай пры прыняцці падобных рашэнняў. «Я хацеў бы пачуць каментар да гэтага закона, перш чым я яго падпішу, па ўсіх зменах, якія вы ўносіце, з той мэтай, ці не паспрыяе гэта таму, што ў нас ізноў пачнецца разбой пры адводзе зямель», - заўважыў ён.

Ён лічыць ненармальнай сітуацыю, калі прымаецца рашэнне аб будаўніцтве фермы на новым месцы, «за трыдзевяць зямель ад канкрэтнага населенага пункта, куды трэба цягнуць дарогу, электрычнасць, прыродны газ, то ёсць інфраструктуру будаваць».

«Нясем вялікія выдаткі. Больш за тое, мы забіраем яшчэ да 50 га, а то і больш, калі будуецца комплекс, зямель сельскагаспадарчага прызначэння», - сказаў Лукашэнка.

Таксама ён звярнуў увагу на забеспячэнне парадку і пры адводзе лясных і іншых угоддзяў для заняцця паляваннем, рыбалоўствам.

«Ніякай бюракратыі быць не павінна, павінна быць эфектыўнасць. Але ў той жа час поўны кантроль з адводам падобных зямель», - сказаў ён. «Занадта шмат у нас, напэўна, сёння з'явілася прыватных паляўнічых угоддзяў, і мы не заўсёды там нармальна кантралюем сітуацыю», - дадаў Лукашэнка.

Між тым, дыктатар адзначыў: «Кантроль - гэта добра, ён заўсёды будзе, але не наносіла б гэта шкода інвестыцыям, якія мы ажыццяўляем, узвядзенню жылля, якое людзі хочуць самі будаваць, просяць зямельныя ўчасткі».