Анатоль Капскі перанёс трохдзённую кому
19- 24.01.2013, 11:34
Кіраўніку футбольнага клуба БАТЭ і аднайменнага прадпрыемства зрабілі найскладанейшую аперацыю.
Умяшанне хірургаў спатрэбілася пасля перанесенай летам цяжкай пнеўманіі. Тады на пахаванне журналіста Сяргея Аляхновіча Анатоль Капскі прыехаў прама са шпіталя. Некалькі месяцаў кіраўнік БАТЭ працаваў у вельмі напружаным рэжыме, аднак наступствы хваробы далі пра сябе ведаць, піша «Салідарнасць».
9 студзеня Анатолю Капскаму зрабілі ў віленскай клініцы аперацыю сэрца і сасудаў. Хірургі пачалі днём, а управіліся за поўнач. Аднаўленне пацыента праходзіла штатна. Аднак раніцай 14 студзеня хворы экстрана выклікаў у палату лекара: «Доктар, мне вельмі дрэнна ...»
Капскаму здавалася, што свядомасць вярнулася зусім хутка. Ён расплюшчыў вочы і спытаў у медсястры: «Усё яшчэ раніца?». Яна адказала: «Так. Толькі не панядзелка, а чацвярга. З вяртаннем»
Гэта быў выхад з 3-сутачнай комы - здарыліся ўскладненні на ныркі і печань.
Цяпер Капскаму ўжо дазваляюць прагулкі. Кіраўнік БАТЭ нават жартуе: «На шляху пад назвай «жыццё» мне сустрэўся цікавы паўстанак. Прыйшлося там затрымацца».