Павялічаная плата за GSM-частоты. Мабільная сувязь таксама падаражэе?

Памер штогадовай платы за выкарыстанне GSM-частот з 1 студзеня 2013 года вырас у Беларусі на 72,5%.

Гэта прадугледжана пастановай Савета Міністраў №1206 ад 26 снежня 2012 года, паведамляе БелТА.

Для вызначэння памеру штогадовай платы за выкарыстанне радыёчастот выкарыстоўваецца досыць складаная формула. Калі не ўдавацца ў падрабязнасці, то памер платы залежыць ад выкарыстоўванага дыяпазону, тэхналогіі, якая прымяняецца, і тэрыторыі, якая ахопліваецца.

Дакументам быў перагледжаны каэфіцыент камерцыйнай каштоўнасці, які залежыць ад выкарыстоўванага дыяпазону: калі раней для GSM-частот ён быў роўны 1 пры выкарыстанні радыёчастотнага спектру на першаснай аснове, то цяпер - 1,15.

Акрамя таго, для сістэм сотавай рухомай электрасувязі з 10 да 15 павялічыўся каэфіцыент, які залежыць ад тыпу радыёслужбы, тэхналогіі ў сістэме радыёсувязі і мэты выкарыстання радыёчастот. У цэлым памер штогадовай платы за GSM-частоты для сотавых аператараў павінен вырасці на 72,5%.

Павышэнне штогадовай платы тэарэтычна можа адбіцца на будучым росце тарыфаў. Але адначасова з ростам платы за GSM-частоты ўрад знізіў яе для радыёчастот сетак трэцяга і чацвёртага пакаленняў (сістэм IMT). Так, для 3G-частот каэфіцыент камерцыйнай каштоўнасці, які залежыць ад выкарыстоўванага дыяпазону, знізіўся ў пяць разоў, каэфіцыент, які залежыць ад тыпу радыёслужбы і тэхналогіі, якая прымяняецца ў сістэме радыёсувязі і мэты выкарыстання радыёчастот, - на 20%.

Нягледзячы на тое, што большасць абанентаў сотавых аператараў Беларусі пакуль карыстаюцца стандартамі GSM-900 і GSM-1800, кампаніі атрымалі важкі аргумент на карысць больш актыўнага развіцця сетак 3G і асваення тэхналогій 4G.