Колькасць пенсіянераў у Беларусі перавысіла 2,5 мільёна

У пенсійную сістэму Беларусі ў 2012 годзе ўліліся больш 133,8 тыс. чалавек.

Пра гэта паведаміла БелТА намеснік начальніка галоўнага ўпраўлення пенсійнага забеспячэння і сацыяльнага страхавання Міністэрства працы і сацыяльнай абароны Ларыса Яшкова.

Для параўнання: у 2011 годзе пенсія была прызначаная 134,2 тыс. чалавек, у 2010-м - 131,5 тыс.

«У рэспубліцы адзначаецца рост колькасці пенсіянераў - упершыню за многія гады колькасць атрымальнікаў пенсій у органах па працы, занятасці і сацабароне перавысіла 2,5-мільённы рубеж і склала на 1 студзеня 2013 года 2 млн. 512,2 тыс. чалавек, - адзначыла прадстаўнік міністэрства. - Ва ўмовах скарачэння колькасці насельніцтва краіны павышаецца і ўдзельная вага пенсіянераў - гэты паказчык ужо набліжаецца да 27%».

Сярод тых, хто ў мінулым годзе здабыў статус пенсіянера, - 79,7 тыс. жанчын і 54,1 тыс. мужчын. Прычым кожнаму восьмаму новаму пенсіянеру пенсія прызначаная па льготных падставах. Так, амаль 16,7 тыс. чалавек выйшлі на пенсію датэрмінова (да дасягнення агульнаўстаноўленага пенсійнага ўзросту: для жанчын - 55 гадоў, для мужчын - 60 гадоў). Сярод датэрміноўшчыкаў пераважаюць жанчыны (іх 9 тыс., а мужчын - 7,7 тыс. чалавек).

Ларыса Яшкова патлумачыла, што атрымальнікамі датэрміновых пенсій з'яўляюцца занятыя на работах з асаблівымі ўмовамі працы (па спісах №1 і №2), работніцы тэкстыльнай вытворчасці, трактарысты-машыністы і іншыя, а таксама занятыя асобнымі відамі прафесійнай дзейнасці (педагагічныя і медыцынскія работнікі, артысты , работнікі авіяцыі і г.д.). Права на датэрміновую пенсію прадастаўлена і грамадзянам, якія маюць пэўны сацыяльны статус: гэта ўдзельнікі ліквідацыі наступстваў катастрофы на ЧАЭС, шматдзетныя маці, бацькі дзяцей-інвалідаў, інваліды з дзяцінства і іншыя.