Экспарт іранскай нафты ўпаў на 40% з-за санкцый

Экспарт іранскай нафты ў сувязі з уведзенымі супраць Ірана міжнароднымі санкцыямі за апошнія дзевяць месяцаў знізіўся на 40%.

Даходы ад яго ўпалі на 45%, перадае АФН са спасылкай на іранскія СМІ.

Па дадзеных агенцтва, іранскі міністр нафты Рустам Касемі ў нядзелю выступаў з дакладам аб стане спраў у сваім ведамстве перад дэпутатамі меджліса. «Згодна з дакладам, з пачатку новага года ў Іране (з сакавіка 2012 года) аб'ёмы продажу нафты знізіліся на 40%, а даходы ад яе ўпалі на 45%», - заявіў парламентарый Гулям Рэза Кацеб (Gholam Reza Kateb), якога цытуе агенцтва ISNA .

Раней улады Ірана заяўлялі, што міжнародныя санкцыі не аказалі прыкметнага негатыўнага ўплыву на экспарт іранскай нафты.

Краіны Еўразвяза раней увялі эмбарга на імпарт іранскай нафты, якое ўступіла ў сілу 1 ліпеня 2012 года. Свае дзеянні краіны ЕЗ патлумачылі тым, што яны хочуць прымусіць Тэгеран адмовіцца ад ядзерных амбіцый. ЗША, шэраг іншых краін Захаду і Ізраіль падазраюць Іран у распрацоўцы ядзернай зброі пад прыкрыццём праграмы мірнага атама. Тэгеран не адмаўляе, што ўзбагачае уран да 20%, аднак заяўляе, што яго атамная праграма накіраваная выключна на задавальненне патрэбаў краіны ў электраэнергіі.