Улады хочуць замяніць беларусаў на в'етнамцаў
46- 11.10.2013, 9:28
- 30,726
Віцебскі гарвыканкам прыдумаў, як вырашыць праблему з недахопам працоўнай сілы
Гэта вынікае з дакумента, які адміністрацыя Першамайскага раёна Віцебска рассылае кіраўнікам прадпрыемстваў. З ім азнаёмілася рэдакцыя «Народных навінаў Віцебска».
У гэтым дакуменце «Аб в'етнамскай працоўнай сіле» паведамляецца наступнае:
«Адміністрацыя Першамайскага раёна г. Віцебска інфармуе, што паводле ліста амбасады Рэспублікі Беларусь у В'етнаме існуе магчымасць выкарыстання на тэрыторыі вобласці в'етнамскай працоўнай сілы (будаўнікі, швачкі, сельскагаспадарчыя рабочыя, слесары, механікі, зваршчыкі).
Просім да 16.10.2013 г. інфармаваць аддзел эканомікі адміністрацыі раёна аб наяўнасці зацікаўленасці ў паказаным пытанні па электроннай пошце economic.adm@mail.ru».
Рассылаецца ён за подпісам першага намесніка кіраўніка адміністрацыі Таісіі Баглай, якая курыруе пытанні работы прадпрыемстваў дзяржуласнасці, малога і прыватнага бізнесу.
Практыка прыцягнення рабочых з краін Паўднёва-Усходняй Азіі ўсё шырэй распаўсюджваецца ў Беларусі з-за масавых уцёкаў грамадзян краіны на заробкі за мяжу. Вядома, што многія жыхары той жа Віцебскай вобласці з'язджаюць у Расею на сезонныя працы.