Прадпрымальнікаў падманулі: прадаваць тавары без дакументаў забароняць

Беларускіх прадпрымальнікаў пазбаўляюць апошніх льгот.

З 1 снежня 2013 года яны не змогуць прадаваць тавары, якія не маюць дакументаў, якія пацвярджаюць іх якасць і бяспеку ў адпаведнасці з патрабаваннямі тэхнічнага рэгламенту Мытнага саюза «Аб бяспецы прадукцыі лёгкай прамысловасці». Пра гэта паведаміў журналістам намеснік прэм'ер-міністра Пётр Пракаповіч, перадае БелТА.

Раней для індывідуальных прадпрымальнікаў - плацельшчыкаў адзінага падатку, якія рэалізуюць прадукцыю лёгкай прамысловасці ў рознічных гандлёвых аб'ектах і на гандлёвых месцах на рынках, дзейнічаў спрошчаны парадак пацвярджэння адпаведнасці гэтай прадукцыі патрабаванням дадзенага тэхрэгламенту да 1 ліпеня 2014 года.

Па словах віцэ-прэм'ера, ужо прынятае рашэнне і ўносіцца адпаведны нарматыўны дакумент, каб праз месяц забараніць індывідуальным прадпрымальнікам карыстацца гэтай льготай.

«Гэта значыць з 1 снежня прадпрымальнікі не змогуць прадаваць тавар, які не мае дакументаў. Усе, хто працуе на беларускім рынку, - малыя, буйныя, сярэднія гандлёвыя сеткі і ІП - будуць працаваць па адзіных правілах і павінны будуць мець адпаведныя дакументы», - сказаў Пётр Пракаповіч.

Паводле яго слоў, гэта будзе на карысць пакупніку, паколькі ён будзе атрымліваць тавары, пра якія будзе мець усю інфармацыю - пра якасць, кошт, бяспеку.

Таксама віцэ-прэм'ер адзначыў, што прадпрымальнікі павінны адмовіцца ад працы праз пасярэднікаў і выбудоўваць новы механізм працы, згодна з якім яны будуць выходзіць наўпрост на вытворцаў. Такая задача неаднаразова агучвалася ІП, і пераходны перыяд, прадугледжаны тэхрэгламентам, - «добрая магчымасць, каб наладзіць пастаўкі тавараў непасрэдна ад вытворцаў».

«Гэта няправільна, што адзін і той жа тэлевізар з Еўропы ў нас каштуе даражэй, чым у Маскве (адкуль ён завозіцца), - падкрэсліў Пётр Пракаповіч. - Для гэтага няма ніякіх падстаў. Няма падстаў для таго, каб ехаць за гэтым тэлевізарам у Маскву, калі можна наўпрост везці яго з Еўропы».

Пасярэднікі павінны быць выдаленыя, адзначыў віцэ-прэм'ер. Пры гэтым Пётр Пракаповіч дадаў: «Мы, вядома ж, будзем карыстацца эканамічнымі метадамі, аналізаваць сітуацыю і настойліва рэкамендаваць працаваць непасрэдна з вытворцамі. А для таго каб не спадзявацца толькі на прыватны сектар, які часцяком пераследуе свае пэўныя мэты, усім аптовым арганізацыям, у якіх маецца доля дзяржавы, якія падпарадкаваныя Міністэрству гандлю, дадзена даручэнне неадкладна ўключыцца ў закупку імпартных тавараў наўпрост з вытворцамі па самых нізкіх коштах, тым самым зрабіць канкурэнцыю астатнім, прыватным, аптавікам, і збіць кошты на імпартныя тавары. Гэта не толькі паменшыць кошт тавараў тут у нас, але і створыць перадумовы для таго, каб нашы людзі не ехалі лішні раз за гэтым жа таварам у Польшчу, Літву і гэтак далей».

Праблемы, звязаныя з выкананнем заканадаўства ў галіне бяспекі прадукцыі легпрама, будуць абмяркоўвацца 4 лістапада ў Менску на форуме прадпрымальнікаў «Тэхнічны рэгламент МС (сертыфікацыя) - беларускае пытанне».

Тэхрэгламент МС аб прадукцыі легпрама ўступіў у сілу 1 ліпеня 2012 года. Для паэтапнага пераходу да адзіных патрабаванняў да 1 студзеня 2013 года дапушчалася вытворчасць і выпуск у абарачэнне на тэрыторыі МС прадукцыі, якая не належала да ўступлення ў сілу тэхрэгламенту абавязковай ацэнцы (пацвярджэнню) адпаведнасці. У Беларусі для індывідуальных прадпрымальнікаў - плацельшчыкаў адзінага падатку гэты перыяд быў падоўжаны да 1 ліпеня 2013 года.

Яшчэ адзін пераходны перыяд тычыцца прадукцыі, на якую да ўвядзення тэхрэгламенту былі выдадзеныя або зарэгістраваныя дакументы аб пацвярджэнні адпаведнасці абавязковым патрабаванням, раней устаноўленым нарматыўнымі прававымі актамі МС або заканадаўствам дзяржавы-члена МС. Вытворчасць і выпуск у абарачэнне такой прадукцыі дапушчалася да 1 ліпеня 2014 года.

Увядзенне патрабаванняў тэхнічнага рэгламенту Мытнага саюза выклікала пратэст беларускіх прадпрымальнікаў: на рынках і ў гандлёвых цэнтрах Беларусі ў канцы чэрвеня - пачатку ліпеня прайшлі забастоўкі прадпрымальнікаў. Прадпрымальнікі выказалі незадаволенасць рэгламентам, заявіўшы, што ён паставіць іх на мяжу жыцця, паколькі абавязвае рабіць дарагую працэдуру сертыфікацыі тавараў лёгкай прамысловасці.

З мэтай аптымізацыі пераходу да патрабаванняў тэхрэгламенту міністэрствы гандлю, аховы здароўя, сельскай гаспадаркі і харчавання, Дзяржкамітэт па стандартызацыі 21 чэрвеня прынялі сумесную пастанову. Згодна з гэтым дакументам для прадпрымальнікаў - плацельшчыкаў адзінага падатку спрашчаецца працэдура сертыфікацыі ў адпаведнасці з патрабаваннямі згаданага тэхрэгламенту пры ўмове прадастаўлення імі суправаджальных дакументаў на тавары. Аднак гэты дакумент таксама выклікаў незадаволенасць у прадпрымальніцкім асяроддзі, якое заявіла аб недасканаласці пастановы.

Фота: «Радыё Свабода»