Bloomberg: Украіну можа чакаць лёс Беларусі

Украінскі ўрад ратуецца ад дэфолту на шкоду дэмакратыі.

Даходнасць украінскіх дзяржаўных аблігацый пачала зніжацца на фоне размоў пра тое, што Расея можа даць ураду фінансавую дапамогу ў сувязі з прыпыненнем еўраінтэграцыі.

Пра гэта піша сайт economics.lb.ua са спасылкай на Bloomberg.

«Некаторыя інвестары спадзяюцца, што Расея прадаставіць вялікія датацыі ў выглядзе пазык і таннага газу. Такім чынам, Украіна стане нагадваць Беларусь - не лепшы прыклад дэмакратыі, але дзе доступ да расейскага фінансавання падтрымлівае аблігацыі і зніжае асцярогі дэфолту або фінансавых рызык», - заявіў выданню лонданскі эканаміст Цімаці Эш са Standard Bank Group.

«Падпісанне гандлёвага пагаднення ЕЗ прывяло б да рэзкага гандлёвага адказу з боку Расеі. З часам Украіна атрымала б вялікую карысць ад гандлёвага пагаднення з ЕЗ, але цяпер яна, магчыма, здымае пагрозу дэфолту ў бліжэйшай перспектыве», - згодны з ім Рэгіс Шатэл'е, стратэг Societe Generale.

У верасні рэйтынгавае агенцтва Moody's панізіла рэйтынг Украіны да пераддэфолтнага ўзроўню Саа1 з магчымасцю далейшага паніжэння. Іншыя найбуйнейшыя агенцтвы - S&P і Fitch - панізілі ўкраінскі рэйтынг ўжо ў лістападзе, але пакуль што толькі да ўзроўню В-, апошняга з серыі «добрых» рэйтынгаў. Аднак прагнозы па рэйтынгах краіны - негатыўныя. Што азначае магчымы перагляд рэйтынгу ў бок далейшага паніжэння на працягу бліжэйшага года.