Аляксандр Алесін: Беларускія ваенныя рамантавалі ў Йемене танкі

Абстраляныя ваенныя спецыялісты займаліся абслугоўваннем прададзеных Беларуссю танкаў.

Такое меркаванне сайту charter97.org выказаў ваенны аглядальнік Аляксандр Алесін, каментуючы ўзброены напад на беларусаў у сталіцы Йемена.

«Йемен з'яўляецца пакупніком беларускай зброі, дакладней, савецкай з Беларусі - танкаў Т-80. У свой час, калі пасля распаду Савецкага Саюза выводзілі ўжо расейскія часткі з былой ГДР, беларускі ўрад палічыў, што расейцы павінны ісці ў Расею «голымі», а танкі і ўсё абсталяванне павінны тут пакінуць. Гэта значыць на нашай тэрыторыі засталося каля 200 танкаў Т-80. Гэта выдатныя танкі, але ў іх ёсць адзін маленькі недахоп - на іх стаіць газатурбінны рухавік, які вельмі пражэрлівы. Гэта наступальныя танкі і яны не падыходзяць для суправаджэння пяхоты, як паказаў вопыт Чачні. І гэту спадчыну пастаянна спрабуюць прадаць», - сказаў эксперт.

Ваенны аглядальнік адзначыў, што арганізацыя па кантролі за звычайнымі ўзбраеннямі ў Еўропе дазволіла ўладам Беларусі вывесці іх экспартную групу і гандляваць імі.

«Гэта значыць, яны не могуць быць пастаўленыя на ўзбраенне, а могуць быць толькі прададзеныя. Але па прычыне вышэйзгаданых «вартасцяў» пакупнікоў на іх не вельмі шмат. Пакуль яны стаялі, то, вядома, адсталі па многіх характарыстыках, плюс неэнакамічнасць і складанасць у абслугоўванні газатурбіннага рухавіка, які патрабуе кваліфікаванага догляду. Нашы ваенныя арганізацыі гэтыя танкі рэкламуюць, прадаюць і мадэрнізуюць. Часткова іх удалося прадаць, і адзін з пакупнікоў - гэта Йемен. Зразумела, што бок, які прадае, павінен забяспечыць сэрвіс і эксплуатацыю гэтых танкаў, і наўрад ці ў Йемене карэнныя плямёны валодаюць навыкамі абслугоўвання такіх танкаў. Мяркую, што нашы спецыялісты маглі ўдзельнічаць у тэхнічным суправаджэнні гэтых машын. Звычайна гэта так і робіцца - па прыватных кантрактах. Гэта маё меркаванне, таму што, магчыма, там ёсць і іншыя ўзбраенні, прададзеныя Беларуссю, але найбольш значны кантракт, адзначаны ў СМІ, гэта танкі Т-80», - падсумаваў Аляксандр Алесін.

Нагадаем, сёння ў сталіцы Йемена Сане грамадзяне Беларусі падвергліся ўзброенаму нападу, адзін з іх забіты, другі паранены. Як стала вядома пазней, абстраляныя замежнікі былі ваеннымі спецыялістамі, працавалі на міністэрства абароны краіны па кантракце.