У цэнтры Менска трамвай сышоў з рэек

Рух трамваяў у раёне станцыі метро «Плошча Перамогі» спынілі з-за ДТЗ.

Трамвайныя шляхі апынуліся перакрытымі. Ці то з-за слізкасці, ці то з-за памылкі чалавека, які кіраваў грамадскім транспартам, трамвай сышоў з каляіны. Ён затрымаўся на скрыжаванні вуліцы Чырвонай і праспекта Машэрава, як раз у месцы, дзе злучаюцца лініі розных напрамкаў («Возера» і «Зялёны Луг»), піша onliner.by.

«Хвілін 10 таму сышоў з рэек трамвай на скрыжаванні Чырвоная - Машэрава, - паведаміў адзін з відавочцаў здарэння. - Затор. Аб'язджайце, калі едзеце ў тым напрамку. Ніхто не пацярпеў».

Часцей за ўсё такое адбываецца з-за таго, што пярэдняя колавая цялежка трамвая едзе па адным напрамку, а задняя - па іншым. Як тлумачылі спецыялісты, так здараецца з-за некарэктнай працы стрэлкі або перавышэння хуткасці.