Мазепін прэтэндуе на 20% акцый «Уралкалію»

Асноўны ўладальнік «УралХіма» Дзмітрый Мазепін блізкі да куплі 20% акцый «Уралкалію» ў партнёраў Сулеймана Керымава.

Пра гэта паведаміла агенцтва Bloomberg са спасылкай на некалькі крыніц, знаёмых з сітуацыяй. Раней крыніцы «Інтэрфакса» паведамлялі, што Дзмітрый Мазепін можа купіць акцыі «Уралкалію» ў Філарэта Гальчава (валодае 7% акцый кампаніі) і Анатоля Скурава (4,8%).

Па дадзеных Bloomberg, яшчэ 8% «Уралкалію» кантралююць іншыя партнёры Сулеймана Керымава, пры гэтым доля кожнага з іх не перавышае 5%. Іх акцыі таксама плануе купіць Дзмітрый Мазепін.

Сам Сулейман Керымаў, пасля продажу «Анэксіму» 21,75% акцый «Уралкалію», якімі ён валодае праз фонд Suleyman Kerimov Foundation, застанецца ўладальнікам яшчэ каля 5% акцый калійнай кампаніі.

На мінулым тыдні стала вядома, што група «Анэксім» Міхаіла Прохарава дамовілася аб куплі 21,75% акцый «Уралкалію» ў Suleyman Kerimov Foundation.

Акрамя Сулеймана Керымава і партнёраў буйным акцыянерам «Уралкалію» з'яўляецца кітайская Chengdong Investment Corporation (12,5% акцый). У свабодным абрачэнні знаходзіцца 53,95% акцый «Уралкалію».

Раней расейскія СМІ паведамлялі пра тое, што Дзмітрый Мазепін кіруе капіталамі Лукашэнкі на Кіпры. Да гэтага з'явілася інфармацыя пра тое, што расейскі бізнесмен можа быць прызначаны віцэ-прэм'ерам Беларусі. У лютым па гэтым пытанні да Лукашэнкі з адкрытым лістом звярнуўся дэпутат Дзярждумы Ілля Панамароў, які, у прыватнасці, пытаўся ў Лукашэнкі пацверджання інфармацыі аб тым, што Дзмітрый Мазепін «атрымаў грамадзянства Рэспублікі Беларусь у рамках спецыяльнай працэдуры, за асаблівыя заслугі перад Беларуссю».