Канфлікт на брэсцкім «Компа» нарастае

Становішча на прадпрыемстве прыкметна распальваецца. Да работнікаў механічнага цэха сталі далучацца і іншыя падраздзяленні, у прыватнасці ўчастак расходных матэрыялаў.

Яны патрабуюць павышэння зарплаты, выплаты кампенсацый на аздараўленне і ў цэлым перагляду сістэмы аплаты працы, піша «Вечерний Брест».

Нагадаем, 8 лютага ў механічным цэху каля 150 чалавек (токары, фрэзероўшчыкі) у ранішнюю змену не ўключылі станкі і адмовіліся прыступіць да працы, так як ім не выплацілі прэмію па выніках студзеня. Ім быў налічаны «голы» заробак.

Пасля публікацый у газетах і інтэрнэце адміністрацыя прадпрыемства палічыла сябе незаслужана пакрыўджанай. Маўляў, рабочыя не шануюць у належнай меры таго, што для іх робіцца, таму кіраўнікі падрабязна распавялі пра тыя льготы, якімі карыстаюцца члены калектыву. А гэта вылучэнне бесадсоткавых пазык (часам вельмі вялікіх, напрыклад на куплю кватэры), аплата ўдзелу ў семінарах па павышэнню кваліфікацыі, матэрыяльная дапамога, затраты на мыйныя сродкі і сродкі гігіены, якія склалі за мінулы год 51 млн рублёў. Далі таксама максімальна поўную інфармацыю аб налічэнні заработнай платы рабочым у студзені. Для параўнання прывядзем дзве лічбы - зарплаты з прэміяй і без прэміі:

Токар шостага разраду: 4 318 792 рублёў, з прэміяй - 5 055 826 рублёў.

Слесар механазборачных работ: 3 822 984 рублёў, з прэміяй - 4 571 185 рублёў.

Фрэзероўшчык: 5 055 887 рублёў, з прэміяй - 5 887 842 рублёў.

Гэтыя лічбы могуць нязначна вагацца ў той ці іншы бок, але ў цэлым яны адлюстроўваюць агульную карціну. Варта толькі ўлічыць, што гэта так званая налічаная заработная плата (гэта значыць «да падатку»).

Сітуацыя з нявыплачанай прэміяй пагоршыла і без таго цяжкі настрой рабочых, выкліканы павышэннем у лютым камунальных плацяжоў і коштаў на цэлы шэраг тавараў і паслуг. «Мала таго, што дзяржава вымушае зацягваць паясы, - наракалі яны прадстаўнікам адміністрацыі, - так яшчэ і прэміі не далі, хоць мы выканалі даведзенае заданне ў мінулым месяцы».

Дырэктар «Компа» Міхаіл Белавусаў, у сваю чаргу, тлумачыць сітуацыю эканамічным бязладдзем. Пачатак года - не лепшы час на рынках збыту. Не ўсё, што зрабілі, атрымалася прадаць, - адкуль быць прэміі?

«Многія супрацоўнікі, - сцвярджае ён, - узялі на прадпрыемстве бесадсоткавыя пазыкі на буйную суму, і цяпер з зарплаты робяцца вылікі. Яны самі павінны былі думаць, як будуць разлічвацца. А павышаць зарплату мы гатовыя, але для гэтага трэба вучыцца працаваць эфектыўна і скарачаць выдаткі. Наша задача - не прымусіць людзей круціцца і круціцца, як думаюць некаторыя, а ўсяго толькі не выконваць непатрэбную працу, якая не прыносіць нікому дывідэнды».

У такой абстаноўцы рабочыя вымушаныя весці дыялог з адміністрацыяй не асабіста, а па перапісцы. Ліст, адрасаваны дырэктару «Компа», «падкінулі» на працоўны стол аднаго з прадстаўнікоў адміністрацыі. У ім гаворыцца:

«У сувязі з сітуацыяй, якая ўзнікла, калектыў нашага прадпрыемства вылучае наступныя патрабаванні:

Падняць зарплату да рэспубліканскага ўзроўню ў машынабудаванні.

Увесці выплаты кампенсацыі на аздараўленне (у памеры аднаго акладу) пры сыходзе ў чарговы працоўны водпуск.

Стварыць незалежную прадстаўнічую камісію для ўрэгулявання працоўных і сацыяльных інтарэсаў работнікаў.

Перагледзець сістэму аплаты працы (перагледзець заработную плату ў бок павелічэння адзін раз у квартал).

Даць адказ (пісьмовы або вусны) на нашыя патрабаванні».