28 сакавiка 2024, Чацвер, 13:45
Падтрымайце
сайт
Сім сім,
Хартыя 97!
Рубрыкі

«Палатачнік» трапіўся на «ліпавым» ордэне

83

Старшыня пастаяннай камісіі «савета рэспублікі» Уладзімір Панцюхоў узнагароджаны ордэнам неіснуючай акадэміі.

Ордэн Пятра Вялікага II ступені «дэпутату» выдала агульнарасейская грамадская арганізацыя «Акадэмія праблем бяспекі, абароны і правапарадку» - тая ж самая, якая раней вырабіла ў прафесара кіраўніка справамі Лукашэнкі Віктара Шэймана.

Пра гэта гаворыцца ў афіцыйнай біяграфіі чыноўніка, размешчанай на сайце «савета рэспублікі».

Як вядома, «Акадэмія праблем бяспекі, абароны і правапарадку» Расейскай Федэрацыі (АБАП) была ліквідаваная 10 снежня 2008 года рашэннем Вярхоўнага Суда па заяве Генеральнага пракурора Расеі.

Сайт charter97.org паспрабаваў звязацца з Уладзімірам Панцюховым для таго, каб даведацца, чаму ў афіцыйнай біяграфіі палітыка паказаны факт яго ўзнагароджання ордэнам неіснуючай акадэміі. Аднак у аддзеле па забеспячэнню працы пастаяннай камісіі па эканоміцы, бюджэце і фінансах «савета рэспублікі», старшынёй якой ён з'яўляецца, паведамілі што «дэпутата» на працоўным месцы сёння «няма і не будзе» і адмовіліся ад каментароў.

Нагадаем, расейская Генпракуратура высветліла, што «Акадэмія праблем бяспекі, абароны і правапарадку» незаконна прысвойвала спецыяльныя званні, якія супадаюць з воінскімі званнямі ў Расеі і выкарыстоўвала ўзоры форменнага абмундзіравання, аналагічныя ваеннай форме.

Супрацоўнікам акадэміі таксама выдавалі службовыя пасведчанні, якія маюць падабенства з пасведчаннямі дзяржузору, якія выкарыстоўваліся імі ў асабістых мэтах, што «стварала ўмовы для карупцыйных праяў і дыскрэдытавала дзяржаўную ўладу». Былі факты выкарыстання службовых пасведчанняў Акадэміі пры здзяйсненні злачынстваў, як правіла, ашуканскіх дзеянняў у асабліва буйных памерах, адзначана ў паведамленні.

Членам акадэміі прысвойвалі спецыяльныя званні - сапраўдны член акадэміі, член-карэспандэнт акадэміі, а таксама ганаровыя званні «Заслужаны дзеяч навукі АБАП» і «Заслужаны юрыст АБАП» з уручэннем адпаведных нагрудных знакаў і пасведчанняў.

Беларускае аддзяленне акадэміі ўзначальвае член «савета рэспублікі» Мікалай Чаргінец.

Гэта не адзіны выпадак, калі лукашэнкаўскія чыноўнікі прысвойваюць сабе «ліпавыя» званні і ўзнагароды. Як раней паведамляў сайт charter97.org, такімі схільнасцямі вызначыліся былы міністр юстыцыі Віктар Галаванаў і старшыня Вышэйшага гаспадарчага суда Віктар Камянкоў.

Напісаць каментар 83

Таксама сачыце за акаўнтамі Charter97.org у сацыяльных сетках