Калінін праваліў экзамен па фінпісьменнасці

Нацбанк Беларусі відавочна паспяшаўся з запускам кампаніі па павышэнню фінансавай пісьменнасці насельніцтва.

Яму варта было б для пачатку падвучыць сваіх супрацоўнікаў, работнікаў банкаў, членаў урада і высокапастаўленых чыноўнікаў іншых міністэрстваў і ведамстваў, а ўжо затым брацца за бізнес і насельніцтва, піша АФН.

Чарговае пацверджанне гэтай высновы сёння прыйшло з прэс-канферэнцыі віцэ-прэм'ера Беларусі Анатоля Калініна, які не змог даступна растлумачыць розніцу паміж валютнымі і рублёвымі крэдытамі на жыллё. Так, тэма не з простых, але ж можна было папросту адмовіцца ад камэнтароў. Праўда, гэта «можна» магчыма толькі ў тым выпадку, калі чыноўнік гатовы прызнацца самому сабе, што пакуль не асіліў дадзенае пытанне. Але Калінін, верагодна, не з гэтай кагорты. І ў выніку...

«Больш выгадна браць рублёвыя крэдыты: менш рызык як для банкаўскай сферы, так і для грамадзян», - папрацаваў прапагандыстам Калінін пасля таго, як Нацбанк адмовіўся аднаўляць валютнае крэдытаванне жылля.

«Па ўсіх прагнозах на бліжэйшую пяцігодку курс валюты будзе стабільным у рамках заяў кіраўніка дзяржавы, урада і Нацбанка», - працягнуў чыноўнік і здзейсніў велізарную памылку, прадэманстраваўшы, што паняцця не мае, што да чаго ў дадзеным пытанні.

Бо зыходзячы з другога аргументу Калініна, менавіта валютныя крэдыты сёння куды больш выгадная, чым рублёвыя. Пры стабільным курсе многія камерцыйныя банкі, якія сядзяць у доўгіх валютных пазіцыях, будуць з радасцю напампоўваць насельніцтва, прычым усіх - і льготнікаў і не льготнікаў, іпатэчнымі крэдытамі па стаўках ніжэй за 10% і, спрактыкаваўшыся за апошнія 3-4 гады на розніцы, гатовыя важдацца з кожным кліентам як з малым дзіцём.

Гэта і разгон будаўнічай галіны з ростам усяго ВУП краіны, і папаўненне ЗВР за кошт прадаванай валюты - забудоўшчыкам, пастаўшчыкам матэрыялаў усё роўна рублямі плаціць.

Але ж Нацбанк адмовіўся ад аднаўлення валютнага крэдытавання не па асабістых матывах: «Мы заявілі, што больш не будзе валютных крэдытаў насельніцтву. І ўсё! Нацбанк не зменіць свайго рашэння, нават калі Сонца перастане свяціць». Упартасць рэгулятара тлумачыцца тым, што ўсё вышэй сказанае пра плюсы валютнага крэдытавання працуе толькі пры адной умове - адмова ад дэвальвацыі беларускага рубля, замацаваная дэкрэтам Лукашэнкі.

І не таму прадстаўнікі Нацбанка адмаўляюцца ад каментароў па гэтым пытанні, што не хочуць разганяць тэму чарговага канфлікту з урадам. А толькі таму, што кінутая сёння Калініным фраза «рублёвыя крэдыты больш выгадныя» азначае, што беларускія ўлады не проста не выключаюць, а не сумняваюцца ў тым, што краіну чакае чарговая і далёка не адна дэвальвацыя. Бум валютнага крэдытавання ва ўмовах дэвальвацыі аўтаматычна сканчаецца рэзкім ростам пратэрмінаванай запазычанасці і можа пакласці банкаўскую сістэму на лапаткі. І Нацбанку гэта добра вядома.

Пры цяперашніх адсоткавых стаўках рублёвыя крэдыты выгадныя толькі ў выпадку будучай дэвальвацыі, неабавязкова трохразовай, але адсоткаў па 30-50% у год і гадоў праз 5 абслугоўванне атрыманага сёння крэдыту на жыллё будзе па кішэні нават маламаёмасным.