«Беллегпрам» выводзіць вытворчасць у краіны трэцяга свету

Канцэрн «Беллегпрам» прапрацоўвае магчымасць размяшчэння замоў у Бангладэш.

Пра гэта паведаміў сёння журналістам галоўны спецыяліст па знешнеэканамічных сувязях канцэрна «Беллегпрам» Аляксей Анфімаў, піша БелТА.

У студзені 2013 года дэлегацыя канцэрна пабывала з візітам у Бангладэш, дзе абмяркоўваліся пытанні супрацоўніцтва. У складзе дэлегацыі былі прадстаўнікі шасці прадпрыемстваў, у тым ліку «Марка», «Белвест», «Палессе», «Алеся», Брэсцкі панчошны камбінат, «Ромгільтэкс». Яны наведалі трыкатажныя і абутковыя фабрыкі краіны, гарбарныя заводы. «Разглядаліся тры напрамкі супрацоўніцтва: арганізацыя прамых паставак у Беларусь бангладэшскай пражы, размяшчэнне заказаў на тэрыторыі Бангладэш на выраб трыкатажных вырабаў і нарыхтоўкі верху абутку, а таксама закупка скураных тавараў абутковымі арганізацыямі канцэрна», - адзначыў прадстаўнік «Беллегпрама».

Паводле яго слоў, пакуль яшчэ дамоўленасці досыць сырыя, разглядаюцца варыянты ўзаемадзеяння. Беларускі бок не зусім задавальняюць прапановы бангладэшскага боку, у прыватнасці тэрміны вырабу, а таксама мінімальныя замовы. Узоры прадукцыі з Бангладэш канцэрн атрымаў, яны разглядаюцца. У першай палове сакавіка ў Менск плануе прыбыць з візітам дэлегацыя бангладэшскіх партнёраў, каб працягнуць дзелавую размова.

Як адзначыў Аляксей Анфімаў, размяшчэнне заказаў на прадукцыю лёгкай прамысловасці Беларусі ў Бангладэш будзе спрыяць павышэнню яе канкурэнтаздольнасці, таму канцэрн зацікаўлены супрацоўнічаць з гэтай краінай.