КНДР зноў пагражае ЗША ядзернай зброяй

Паўночная Карэя чарговым разам распаўсюдзіла пагрозы на адрас ЗША.

КНДР заявіла, што «ператварылася ў цалкам незалежную дзяржаву, якая валодае ядзернымі і ракетнымі сіламі» і што кантынентальная частка «выклятага ворага» знаходзіцца ў межах іх дасяжнасці. Пра гэта гаворыцца ў заяве аднаго з чальцоў паўночнакарэйскага Нацыянальнага камітэта мірнага ўрэгулявання, змешчанай у сераду на сайце Урымінзакіры, паведамляе ІТАР-ТАСС.

Цэнтральная газета КНДР «Надон сінмун», у сваю чаргу, выказвае ўпэўненасць, што народная рэспубліка на чале з маршалам Кім Чэн Ынам «з ягонымі выдатнымі ваеннымі здольнасцямі напэўна атрымае перамогу ў супрацьстаянні з ЗША, да якога прыкаваная ўвага ўсяго свету».

КНДР таксама абвінаваціла ЗША ў тым, што развіццё сітуацыі на Карэйскай паўвыспе «спакваля набліжаецца да непрадказальных этапу» і можа стаць выбухованебяспечным. Пра гэта ў сераду заявіў паўночнакарэйскі дыпламат Со Сэ Пхэн, выступаючы на сэсіі Канфэрэнцыі раззбраення.

Ён зноў падкрэсліў, што праведзенае ў гэтым месяцы Пхеньянам трэцяе ядзернае выпрабаванне было «абаронай суверэнітэту краіны» і «рашучым крокам да самаабароны» перад абліччам «варожых дзеянняў ЗША бессэнсоўным парушэннем законнага права КНДР на запусканне спадарожніка ў мірных мэтах».

У цэлым уся гаворка сталага прадстаўніка КНДР пры Канфэрэнцыі раззбраення ўтрымлівала вострую крытыку на адрас Вашынгтона. Так, Са Сэ Пхэн заявіў, што «ЗША шматразова злоўжывалі паўнамоцтвамі Рады Бяспекі ААН, робячы вымовы КНДР за запусканне спадарожніка». Менавіта таму Пхеньян і «быў вымушаны прыняць важную пастанову» і «правесці ядзернае выпрабаванне».

Паўночнакарэйскі дыпламат абвінаваціў Вашынгтон ва ўжыванні падвойных стандартаў, заўважыўшы, што менавіта Злучаныя Штаты «запусцілі больш за ўсё спадарожнікаў, у тым ліку вайсковыя», сярод краін-чальцоў ААН, зрабілі больш за ўсё ў свеце запусканняў «міжкантынентальных балістычных ракет», здольных несці ядзерныя набоі, а таксама больш за ўсё ядзерных выпрабаванняў. У такой сітуацыі, папярэдзіў дыпламат, ЗША могуць выбіраць толькі сярод двух варыянтаў - паважаць права КНДР на запусканні спадарожнікаў і адкрыць шлях да палітыкі паслаблення напружанасці і стабільнасці альбо «ісці далей няправільнай дарогай, якая вядзе да небяспечнай сітуацыі».

ЗША і КНДР фармальна знаходзяцца ў стане вайны з 1953 года, калі было падпісанае пагадненне аб замірэнні пасля заканчэння трохгадовай Карэйскай вайны. Прызнаючы ў якасці адзінай законнай дзяржавы Рэспубліку Карэя, Злучаныя Штаты адмаўляюцца ад дыпламатычных стасункаў і падпісання дамовы аб міры з Паўночнай Карэяй.

Стасункі паміж КНДР і ЗША абвастрыліся пасля зробленага ў снежні мінулага года ў КНДР запускання штучнага спадарожніка Зямлі (ІСВ) «Кванмэнсон-3» («Зіхатлівая зорка-3») і трэцяга ядзернага выпрабавання 12 лютага. Дзеянні Паўночнай Карэі асудзілі NАТО, ААН, ЕЗ, ЗША, Нямеччына, Вялікабрытанія, Аўстралія, Японія, Кітай і Францыя.

У Пхеньяне мяркуюць, што рэзалюцыя Рады Бяспекі ААН, якая павялічвае санкцыі ў дачыненні да КНДР у сувязі з запусканнем спадарожніка, была прынятая пад ціскам ЗША. Яе кіраўніцтва адмаўляецца прызнаць гэты дакумэнт, што пазбаўляе краіну права на цывільнае даследаванне касмічнай прасторы.

Раней паўночнакарэйскае вайсковае камандаванне абвінаваціла ЗША ў спробах справакаваць вайну на Карэйскай паўвыспе. Прадстаўнік войска КНДР пераказаў праз тэлефон паведамленне амерыканскаму генэралу Джэймсу Турману, у якім адзначаецца, што агрэсіўныя дзеянні ЗША могуць прычыніцца да ўзброенага канфлікту. «Вам варта памятаць, што тым, хто развязвае войны, пагражае бязлітаснае знішчэнне», - гаворыцца ў паведамленні.

Гэта заяву ў Пхеньяне зрабілі незадоўга да старту ў сакавіку маштабных супольных вучэнняў вайскоўцаў ЗША і Паўднёвай Карэі. Гэтыя манэўры ў КНДР назвалі «актам агрэсіі» і «вельмі небяспечным учынкам».