Быхаўскія даяркі: Вымушаныя красці, каб пракарміць дзяцей
94- 7.02.2013, 15:28
На днях у будынку Ямніцкага сельвыканкама адбылося выязное пасяджэнне суда Быхаўскага раёна пад старшынствам Змітра Гудзіны.
На пасяджэнні разглядалася справа чатырох даярак СВК «Валадарскага», якія 12 студзеня спрабавалі скрасці з фермы ў вёсцы Ямнае 10 літраў малака, піша ПЦ «Вясна».
Першым суд разгледзеў пратакол на Таццяну Караленка, якая ўжо больш за дваццаць гадоў працуе даяркай у СВК «Валадарскага» і ніколі раней у падобных крадзяжах заўважаная не была. Як прызналася даярка, 12 студзеня яна сапраўды ўзяла з фермы два літры малака для дзяцей, таму што зарплата маленькая - адзін мільён трыста тысяч рублёў - і грошай не хапае нават на куплю неабходных прадуктаў харчавання.
Аналагічныя прычыны назвалі і іншыя даяркі, якія былі заўважаныя ў крадзяжы.
Неабходна адзначыць, што непасрэдны начальнік жывёлаводаў, загадчык фермы ў вёсцы Ямнае Сяргей Новікаў ахарактарызаваў усіх даярак, якія правініліся, як добрых, добрасумленных, працавітых работнікаў, якія раней ніколі не былі заўважаныя ў крадзяжы.
З тым, што зарплата ў работнікаў жывёлагадоўлі, «зразумела, маленькая», пагадзіўся і намеснік начальніка Быхаўскага РАУС Аляксандр Анфісаў, аднак гэта не з'яўляецца падставай для крадзяжоў.
Па выніках разгляду справы суддзя Зміцер Гудзіна пакараў кожную з заўважаных у крадзяжы малака жанчын штрафам у памеры 10 базавых велічынь (1 000 000 рублёў).
Застаецца незразумелым, якім чынам будуць харчавацца і карміць сваіх дзяцей даяркі, калі заплацяць мільённыя штрафы пры зарплаце ў 1 300 000 рублёў.
Праца даяркі ў сельскай гаспадарцы лічыцца вельмі складанай і патрабуе вялікіх высілкаў і выдаткаў працы.
Застаецца нагадаць, што, на думку Аляксандра Лукашэнкі, даяркі ў Беларусі атрымліваюць зарплату ў памеры 700 - 1000 даляраў ЗША.