Арэндную плату для бізнесу паднялі «імем рэвалюцыі»

Лукашэнка запатрабаваў імем рэвалюцыі падняць арэндную плату для бізнэсу да рынкавай.

Такое патрабаванне ён выказаў на нарадзе, прысвечанай абмеркаванню працы Упраўлення справамі, паведамляе БелТА.

«Што тычыцца арэнды будынкаў і памяшканняў, імем рэвалюцыі прывесці ўсё ў адпаведнасць з рынкавым коштам! У Менску сёння праблем здаць плошчы ў арэнду няма. Але галоўнае, што ў арэнду за капейкі здаем, а яны пераздаюць у субарэнду ў 3-4 разы вышэй», - заўважыў дыктатар і даручыў Камітэту дзяржкантролю звярнуць на гэта ўвагу.

Распавядаючы пра праблему павышэння эфектыўнасці выкарыстання будынкаў і памяшканняў, нядаўна прызначаны кіраўніком справамі Лукашэнкі Віктар Шэйман адзначыў, што ў бліжэйшы час разбярэцца з тым, як нерухомасць здаецца ў арэнду.

На нарадзе было адзначана, што на сённяшні дзень арэндная плата ў 2-3 разы ніжэйшая за дзеючыя ў Менску камерцыйныя прапановы. Пры гэтым у ГГУ шырока практыкуецца заключэнне дамоў такім чынам, што асобныя камерцыйныя структуры атрымліваюць неабгрунтаваныя прывілеі, шэрагу камерцыйных фірмаў плошчы прадастаўлены без правядзення аўкцыёну на права заключэння дамовы арэнды.