Украінцаў пастанавілі «дэпартаваць» пасля іх ад'езду з Беларусі
1- 30.03.2013, 8:50
Пастанова аб дэпартацыі ўкраінскіх грамадзян, затрыманых 24 сакавіка, будзе прынятая ў красавіку.
Як паведаміла БелаПАН кіраўнік арганізацыі, якая знаходзіцца ў Луцку, Майя Масквіч, афіцыйная пастанова ў пытанні дэпартацыі затрыманых на Дзень Волі ў Менску трох украінскіх грамадзян - чальцоў моладзевай арганізацыі «Нацыянальны альянс» - будзе прынятая напачатку красавіка.
Дакладная дата разгляду справы аб дэпартацыі Юліі Грышчук, Юліі Слівінскай і непаўналетняга Назара Зеліноўскага невядомая. «Ім сказалі, што гэта адбудзецца праз дзесяць дзён і ім пісьмова паведамяць», - адзначыла Масквіч.
На пытанне, чаму актывісты, якіх афіцыйна не дэпартавалі, не наважыліся заставацца ў Беларусі, яна заявіла, што хлопцы вельмі хацелі дадому.
Грышчуук, Слівінская і Зеліноўскі былі затрыманыя 24 сакавіка пасля акцыі з нагоды 95-годдзя абвяшчэння Беларускай Народнай Рэспублікі. Затрыманне адбывалася, калі моладзь выходзіла з маршрутнай таксоўкі.
На наступны дзень Слівінская і Грышчук былі пакараныя адным днём адміністрацыйнага арышту і вызваленыя з-пад варты ў зале суда з прычыны адбыцця пакарання, Зеліноўскаму вынесенае папярэджанне.
Актывісты прыбылі ў Менск, каб падняць на акцыі ўкраінскія сцягі ў рамках праекта «Украінская прысутнасць».