Завершанае польска-расейскае расследаванне катастрофы пад Смаленскам

Польскія і расейскія следчыя скончылі сумеснае расследаванне катастрофы самалёта прэзідэнта Польшчы Леха Качыньскага ў 2010 годзе.

Пра гэта паведаміў афіцыйны прадстаўнік СК Расеі Уладзімір Маркін, перадае «Інтэрфакс».

«У перыяд з 18 лютага па 7 сакавіка 2013 года ў Маскве і Смаленску была праведзеная сумесная праца следчых СКР і прадстаўнікоў галоўнай ваеннай пракуратуры Польшчы ў рамках расследавання катастрофы 10 красавіка 2010 года польскага самалёта Ту-154 пры пасадцы на аэрадром «Смаленск-Паўночны», - сказаў У.Маркін.

Ён адзначыў, што ў ходзе работ зробленыя дадатковыя агляды дрэў і фрагментаў судна, канфіскаваныя ўзоры канструкцыі самалёта для параўнальнага даследавання.

«У ходзе дадзеных следчых дзеянняў канфіскавана больш за 300 узораў, па якіх будуць праведзеныя розныя судовыя экспертызы як на тэрыторыі Расеі, так і ў Польшчы», - сказаў У.Маркін.

Паводле яго слоў, канфіскаваныя аб'екты былі даследаваныя расейскімі і польскімі экспертамі ў галіне трасалогіі, металазнаўства, выбухатэхнікі з ужываннем адмысловых тэхнічных сродкаў.

«Па выніках аглядаў і даследаванняў, экспертамі ўстаноўлена, што на агледжаных і даследаваных аб'ектах якія-небудзь сляды выбуху адсутнічаюць», - сказаў прадстаўнік СКР.

Самалёт польскіх ВПС Ту-154 разбіўся пад Смаленскам 10 красавіка 2010 года. На яго борце знаходзілася афіцыйная польская дэлегацыя на чале з прэзідэнтам Лехам Качыньскім, якая ляцела ў Катынь для ўдзелу ў мемарыяльных мерапрыемствах. Загінулі 96 чалавек - 88 пасажыраў і восем членаў экіпажа.

У студзені 2011 года Міжнародны авіяцыйны камітэт апублікаваў канчатковую справаздачу аб выніках тэхнічнага расследавання катастрофы самалёта. Непасрэднай прычынай крушэння было прызнанае рашэнне экіпажа не сыходзіць на запасны аэрадром, а сістэмнымі прычынамі - недахопы ў забеспячэнні палёту і падрыхтоўцы экіпажа.

Вынікі расследавання былі перададзеныя расейскім следчым органам, якія працягнулі крымінальная расследаванне авіякатастрофы ў кантакце з праваахоўнымі органамі Польшчы.

Між тым, на працягу доўгага часу Польшча патрабуе ад Расеі вярнуць ёй абломкі прэзідэнцкага самалёта. У Маскве заяўляюць, што гэта будзе магчыма толькі пасля завяршэння следства.