Канфіскаваныя на мяжы кветкі абвалілі кошты

Напярэдадні 8 сакавіка кіраўніцтва сталіцы прымусіла многіх прадстаўнікоў кветкавага бізнэсу літаральна завыць.

Як стала вядома «Салiдарнасцi», ноў-хаў гэтага года ад менскіх уладаў: «Беларускім жанчынам - беларускія кветкі». Напярэдадні Міжнароднага жаночага дня з адмашкі чыноўнікаў Галоўнага ўпраўлення спажывецкага рынку Менгарвыканкама ў сотнях месцаў сталіцы (падземныя пераходы, крамы, гандлёвыя цэнтры, ГУМ, ЦУМ, «На Нямізе», «Сталіца» і іншыя) з'явіліся дадатковыя пункты продажу кветак.

На «стыхійных» пунктах ужо некалькі дзён прадаюцца кветкі спецыяльна да свята. Праўда, не толькі беларускія, але і галандскія, канфіскаваныя напярэдадні на беларуска-польскай мяжы. За таннымі букетамі выстройваюцца чэргі. Тым часам прадстаўнікі прыватнага і аптовага бізнесу нясуць страты.

Опт

- У гэтым годзе аптовыя пастаўкі з Галандыі затрымаліся на дзень-два. Выпадкаў канфіскацыі грузаў на беларуска-літоўскай мяжы не было, але амаль усе фуры ставіліся на дадатковы агляд з пералікам прадукцыі, чаго ў мінулыя гады не здаралася. Такім чынам зацягваліся тэрміны прыбыцця паставак на менскія склады, і, адпаведна, у прыватную розніцу да нашым пастаянным кліентам-прадпрымальнікам, - распавялі ў адной з найбуйнейшай беларускіх аптовых фірмаў - пастаўшчыку галандскай кветкавай прадукцыі на мясцовы рынак.

Розніца

Тым часам многія беларускія прыватнікі - уладальнікі кветкавых крам - звяртаюцца ў адміністрацыі гандлёвых цэнтраў са скаргамі на тое, што адбываецца: несумленная канкурэнцыя, якая літаральна ставіць на калені іх бізнэс.

- Мы штомесяц плацім мільёны рублёў за арэнду, падаткі, прадастаўляем працоўныя месцы, і, пры гэтым, працуем з мінімальнай рэнтабельнасцю, у надзеі, што некалькі раз у год, у тым ліку напярэдадні 8 сакавіка, зможам трохі падзарабіць, - дзеліцца прадпрымальнік Уладзімір. - І што маем цяпер: сотні «стыхійных» кропак, дзе прадаюцца ў асноўным галандскія канфіскаваныя кветкі па кошце ніжэй закупачнага. Напрыклад, побач з маёй крамай, якая працуе ўжо больш за пяць гадоў у цэнтры Менска, сёння чатыры такіх кропкі, дзе ўжо нават не хаваюць, што гандлююць канфіскаваным таварам. А яшчэ ўчора яны казалі, што гэта прадукцыя ад беларускага вытворцы. У гэта можа паверыць абывацель. Толькі не мы - людзі, якія працуюць у кветкавым бізнесе ўжо шмат гадоў, - якія сапраўды змогуць па якасці адрозніць беларускую кветку ад галандскай.

- Так паводзяць сябе толькі ірвачы. Сёння яны актыўна працуюць, насычаюць рынак кветкамі. Заўтра сыходзяць, а мы застаемся - але ў якім стане? Кіраўніцтва краіны рэгулярна перакрывае кісларод прыватнікам, так званым «купі-прадай». А як жа дзейнічаюць самі ўлады? Адбяры-прадай! Горш не бывае. Пры гэтым галандскі тавар прадаецца ў рамках разнарадкі зверху «Купляйце беларускае!», - с горыччу выказваецца ўладальніца кветкавай крамы Вольга.

Сваімі вачыма

Карэспандэнт «Салiдарнасцi» адправілася ў Гандлёвы Цэнтр «Сталіца», дзе ў чацвер арганізавалася некалькі «стыхійных» кропак па продажу кветак. У наяўнасці цюльпаны, ружы... Тут жа шыльды з надпісам «Канфіскат». А вось і расцэнкі:

Афармленне букетаў пакупнікам не прапануецца. Прадаўцы працуюць без касавых апаратаў.

Адзначым, што сёння рынкавы кошт у розніцы на галандскі цюльпан складае прыкладна 15 тысяч, ружу - 30-50 тысяч беларускіх рублёў.

Афіцыйна

- Беларускія вытворцы - «ДорОрс», «Кветкі сталіцы» і іншыя - падрыхтаваліся да свята, і таму арганізаваная такая колькасць дадатковых месцаў для збыту ўласнай прадукцыі. Гэта часовыя аб'екты, - сказала начальнік аддзела арганізацыі гандлю і грамадскага харчавання Галоўнага ўпраўлення спажывецкага рынку Менгарвыканкама Тамара Ціханава. - Толькі на Камароўскім рынку з'явілася дадатковых 80 месцаў. Так што Камароўка заквітнела: тут і беларускія цюльпаны і галандскі канфіскат! Пакупніку дадзена магчымасць купіць букет без чаргі і па прымальным кошце ў любой кропке Менска.

- А як жа прыватны бізнес? Як яму працаваць, калі па-суседску прадаецца канфіскаваны тавар па кошце ніжэй закупачнага?

- Канфіскаванага тавару мізэрны адсотак, так што наўрад ці існуе нейкая праблема, - сцвярджае суразмоўца.