Януковіч можа распусціць Раду?

Прэзідэнт Украіны Віктар Януковіч можа распусціць Вярхоўную Раду.

Пра гэта заявіў у парламенце спікер украінскага парламента Уладзімір Рыбак.

«Я праводзіў кансультацыі з прэзідэнтам. Так, ён можа распусціць парламент, калі такая сітуацыя ў парламенце, як ёсць цяпер, будзе працягвацца. Калі будзе блакаванне», - заявіў ён.

Спікер дадаў, што ў такой сітуацыі ўсе палітычныя сілы прыйдуць да неабходнасці знаходжання кансенсусу, піша «РБК-Украіна». «Апазіцыя гэта таксама разумее», - адзначыў Рыбак.

У той жа час спікер упэўнены ў тым, што Вярхоўная Рада будзе працаваць 19 сакавіка.

У сваю чаргу, апазіцыя заявіла, што чакае прэзідэнта ў Радзе менавіта 19 сакавіка. «Мы чакаем Януковіча ў наступны пленарны аўторак у парламенце. Прэзідэнт павінен адрэагаваць на наш палітычны і эканамічны маніфест. Ён павінен прыйсці ў парламент і даць справаздачу, у тым ліку выступіць са штогадовым пасланнем», - заявіў кіраўнік фракцыі «Батькивщина» Арсеній Яцанюк.

Кіраўнік фракцыі «Свабода» Алег Цягнібок адзначыў, што ў выпадку, калі Януковіч не зробіць справаздачу перад Радай, апазіцыя будзе дамагацца правядзення датэрміновых выбараў.

Цяперашні этап супрацьстаяння ўлады і апазіцыі выкліканы тым, што Вышэйшы адмінсуд учора пазбавіў дэпутацкіх паўнамоцтваў Сяргея Уласенку («Батькивщина»), абаронцу Юліі Цімашэнка, за сумяшчэнне дэпутацкіх абавязкаў з адвакацкай дзейнасцю.

Апазіцыя ў сувязі з гэтым блакуе трыбуну Вярхоўнай Рады, і, як заявіў нардэп з «Батькивщины» Уладзімір Бандарэнка, гэтае блакаванне будзе працягвацца да роспуску Рады і прызначэнні перавыбараў.

Згодна з украінскім заканадаўствам, калі парламент будзе непрацаздольным 30 дзён, прэзідэнт мае права яго распусціць. 19 сакавіка мінае палова гэтага тэрміну.